amalinks wokungena

Breaking News

Uzulu Umangaliswa Yikunyamalala Kwamadayimana Abiza $15billion


Umongameli Robert Mugabe

Abadabuka eZimbabwe abaseBotswana sebesole amazwi kamongameli Robert Mugabe othi ilizwe lilahlekelwe ngamadayimani eMarange abiza amabillion alitshumi lanhlanu amadollar-$15billion, bezibuza ukuthi pho, usizo lokudinga ulwazi ngamadamani emazweni anjenge Botswana lwancedani.

Umongameli Mugabe, kungxoxo ayenze lentathelizindaba kumabonakude weZTV, utshele isizwe ukuthi iZimbabwe ilahlekelwe ngamadola angaba ngamabillion alitshumi lanhlanu $15billion, ngenxa yobuqili benkokheli kuhulumende emsebenzini wokwenjiwa kwamadayimana koMarange.

Lokhu kutshiye inengi limangele noma nje lingethukanga, ngoba bevele behlala becabangela ukuthi kulokunengi okungahambi kahle emigodini yeMarange.

UMugabe uthi iZimbabwe kwakumele ifunde emazweni afana leBotswana indlela yokwemba ngayoamatshe aligugu la njalo ithole imali ezasiza isizwe kumadayimana eMarange.

Kodwa kukhanya elibele ukuthi iZimbabwe yathumela iqula ukuzofunda ngokwenjiwa kwamadayimani eBotswana, njalo yathembisa ukuthi izalandela isibonelo seBotswana. Ucine encoma kodwa umongameli Ian Khama ngokwemba amadayimani okuncedise ingqubelaphambili yeBotswana.

Umnunzana Mandla Nkosi, yena obalileyo kumfundo zomnotho, uthi kuyamangalisa okukhulunywa ngumongameli Mugabe ngemva kokuba iZimbabwe ithathe uhambo ukuza kweleBotswana.

“Uma ungakhumbula kulabaka hulumende abathunywa bangena eBotswana kanye leNamibia ukufunda ngendlela zokusebenza amadayimani. Ngaleso sikhathi kwakulenkulumo yokuthi kukhona okunga hambi kahle eMarange kodwa umongameli Mugabe kakulalelanga lokhu”.

Uqhubeke esithi uhulumende weZimbabwe uyenze ngabomu esekela kunguthaphutshiye eMarange kungela mizamo yokumisa lokhu. UNkosi uthi bekumele uhulumende, njengokwenzakala eBotswana engangeneli ekwembeni amadayimani eMarange kodwa anikeze inkampani ezilolwazi.

Asiboni uncedo lokuzakwabeZimbabwe eBotswana. Uhulumende bekumele anikeze amakampani alolwazi ukuthi agebhe njalo athengise amadayimani yena ahlale eceleni elandela okwenzakalayo. Kumele batshiye ukwemba kungcitshi zakhona”.

Abanye bathi ukuthumela inhloli zikahulumende eBotswana kwakuyize ngoba uhlelo lokuzithaphuzela luvele soluphakathi, kukanti njalo inengi liyavuma ukuthi lobuyibufakazi bokungcola okukhona phakathi kukahulumende weZANU PF, uzulu yena edubeka.

please wait

No media source currently available

0:00 0:02:24 0:00
Lapho esitholakala khona

XS
SM
MD
LG