amalinks wokungena

Breaking News

Abantu koBulawayo Banika Igazi Labo iNational Blood Services Zimbabwe


UMnu. Taklent Bhebhe unika igazi inhlanganiso yeNational Blood Services.
UMnu. Taklent Bhebhe unika igazi inhlanganiso yeNational Blood Services.

Abantu bako Bulawayo ngoLwesithathu bamanyene lamazwe womhlaba ekunanzeni imisebenzi yokubuthaniswa kwegazi emhlabeni jikelele ngosuku lwe-World Blood Donor Day.

Emkhosini lo kuphume umbiko othi abadala abapha igazi balutshwana kakhulu uma kuqathaniswa labatsha nomanje kuyibo abadinga ukusebenzisa elinengi okwedlula abasakhulayo.

Kube lokufola abantu bebhoda idolobho lonke bebonisana ngokuqakatheka kokupha igazi bekhokhelwa ngabenhlanganiso yeNational Blood Services Zimbabwe.

UMongikazi uNonkululeko Ndebele
UMongikazi uNonkululeko Ndebele

Abafundi abanengi baphe inhlanganiso le igazi emkhosini walonyaka olesihloko esithi ‘Blood Donation in Emergencies’.

UMnu. Sifundo Ngwenya, obona ngokuqhutshwa kwenhlelo zokuthathwa kwegazi eMatabeleland, uthe linyanga ngeyokunanza ukuqakatheka kokupha igazi umhlaba jikelele.

UNgwenya uthe unzima umthwalo lo ngoba akusibo bonke abantu abapha igazi.

UAmbassador Mehluli Sibanda, okhokhela ukupha igazi eZimbabwe oyintathelizindaba, uthe uhlupho yikuthi abantu bayesabela ukubanjwa imikhuhlane lapho besipha igazi.

Kuthi-ke uNkosikazi Siphilisiwe Phiri uthe okwamenza waqala ukupha igazi kungemva kokubona ingozi yemota lapho okwalahleka igazi elinengi.

Kunanzwa usuku lweBlood Donor Day koBulawayo.
Kunanzwa usuku lweBlood Donor Day koBulawayo.

Obona ngezokuhlolwa okuphakemeyo kwegazi esibhdedlela seMpilo Central Hospital, uMnu. Abel Waldman, uthe babhekana lodubo lokusilela kwegazi ngezikhathi zekhefu.

Okwamanje igazi eZimbabwe lithengwa ngekhulu lamadola - $100 - ezibhedlela zikahulumende, kuthi lingahlolisiswa libize ikhulu elilamatshumi amabili amadola - $120.
Abanye labo ngabathandabuza ukupha igazi bekhala ngokuthi laloba besipha igazi kungela mbadalo bona nxa sebelifuna kumbe abosendo bacina sebelithenga ngentengo ephezulu. AbeNational Blood Services Zimbabwe bathi balithengisela uzulu olidingayo leli gazi ngoba labo baba lendleko yokulibuthanisa lokulihlolisisa andubana ligcinelwe izigulane.

Udaba Esilethulwe NguNompumelelo Moyo
please wait

No media source currently available

0:00 0:03:53 0:00

XS
SM
MD
LG