amalinks wokungena

Breaking News

Uzulu Usezacitshelwa Amagetsi Ukwedlula Obekusenzakala-ZESA


Ikhomishini ekhethwe nguhulumende ukukhangela ukusebenza kwamankampani kahulumende ethiwa Competition and Tariff Commission ibe lomhlangano lezakhamizi labosomabhizimusi koBulawayo ngolweSibili, olandele owenzelwa eHarare ngeviki edluleyo.

Injongo yawo ibingeyokukhangelisisa ukusebenza kwenkampani yamandla kagetsi eye Zimbabwe Electricity Supply Authority-ZESA. Emhlanganweni lo isiphathamandla seZESA sibikwa sithe abantu beZimbabwe kumele bekele ukukhalaza ngenhlawulo yamandla kagetsi ngoba kwele Zimbabwe inhlawulo yamagetsi iphansi kakhulu ukwedlula kwamanye amazwe.

UMnumzana Rodrick Fayayo ngumgcinisihlalo wenhlanganiso ye Progessive Bulawayo Residents Association obesemhlanganweni wanamhla. UFayayo ulandisele uBrenda Moyo weStudio 7 okunye okukhulunywe ngakho emhlanganweni lo.

Kusenjalo inkampani yeZESA izolo yazise ukuthi ukucitsha kwamagetsi kuzakwengezelela kusukela ngolweSihlanu oluzayo kusiyafika kumhlaka 21 ngoNkwenkwezi ngoba izabe iphatheke ngokulungisa imitshina yamagenerator emibili esititshini samagetsi eKariba.

IZESA ithi ngalokhu amagetsi asezacitsha ukudlula lokho obekusenzakala esikhathini esedluleyo. Abaninibhizimisi bathi ukucitsha kwamagetsi kubuyisela muva intuthuko yenotho yelizwe.

Usomabhizimisi wakoBulawayo uMnumzana Michael Bathandi Mpofu utshele uBrenda Moyo ukuthi kaboni uhlupho lwamagetsi lulungisiswa masinyane ngoba uhulumende engela mali njalo engela budlelwano obuhle lamazwe athuthukileyo.

‚Äč
XS
SM
MD
LG