amalinks wokungena

Breaking News

Uzulu Uthakazelela Iqembu Lama Warriors Eliphakamise Inkezo yeCOSAFA


Kubelokuthokoza okudibene lokudana kubalandeli bomdlalo wenguqu kwele Zimbabwe ngempelaviki edluleyo ngemva kokuphatheka kwamaqembu amela ilizwe kumncintiswano we COSAFA Championships kanye lowe Total Women’s Africa Cup of Nations 2018 qualifiers.

Uzulu olandela umdlalo wenguqu uthabe waba manzi te ngoMgqibelo ngemva kokuba iqembu labesilisa elimela ilizwe emdlalweni wenguqu liphakamise inkezo yeCOSAFA ngemva kokunqoba ele Zambia nge 4 ka 2 emdlalweni oqhutshelwe elizweni lase South Africa edolobheni lase Polokwane.

Limpumela itsho ukuba iqembu le Zimbabwe seliphakamise linkezo okwemihla eyisithupha selokhu laqala ukuphatheka kulumncintiswano ngomnyaka ka 1997.

Intokozo yokuphakamisa kweqembu lama Warriors isicoco se COSAFA iphenduke yaba yikudana ngeSonto ngemva kokuba iqembu labesifazane elimela ilizwe emdlalweni wenguqu ele Mighty Warriors lingasaphumelelanga ukuba ngelinye lamaqembu azaphatheka kumncintiswano walonyaka owe Total Women’s Africa Cup of Nations ozaqhutshelwa elizweni laseGhana ekupheleni kwalonyaka.

Ama Mighty Warriors adibane leqembu leShepolopolo elase Zambia emdlalweni obulamahlandla amabili lenelisa ukunqoba nge 1 ka nya emdlalweni wehlandla lakuqala odlalelwe kwele Zambia kwathi ngeSonto umdlalo wehlandla lesibili uphele iqembu le Zambia linqobe nge 2 ka 1 okutsho ukuba zibe ngutshiki lobhanqa 2 ka 2 nxa sekuhlanganiswa impumela yemidlalo emibili kwathi ele Shepolopolo laseliphumelela ukuya eGhana ngoba lona lihlohle kabili lidlala lingekho ngekhaya.

Intathelizindaba yezemidlalo uNash Mkokwayarira uthi yena amalungiselelo awenziwe yilawamaqembu phambilini komdlalo wehlandla lesibili yiwo awenze umehluko phakathi kwawo.

“Ukunqotshwa kwama Mighty Warriors edlala esekhaya kutshengisa ukuba amalungiselelo ethu awakho mahle ngoba ungakhangela ukuba ekuphendukeni kwabo bevela eZambia iqembu leli ligade ibhasi kwathi iqembu le Zambia lasebenzisa indizamtshina laqalela ele Mighty Warriors ukufika kuleli.

“Lokhu kukhomba ukuba indlela okukhangelelwa ngayo amaqembu ethu akutshengiseli ukuba singabantu abazimiseleyo yikho ke amantombazana alahlekelwe lithuba lokuya eGhana ngoba amalungiselelo abengamanga kuhle.”

Ukungayiphatheka kumidlalo ye Total Women’s Africa Cup of Nations kutsho ukuba iqembu le Mighty Warriors lilahlekelwe njalo lithuba elokuyadlala kumidlalo yezizwe zomhlaba ezaqhutshelwa elizweni le France ngomnyaka ozayo njengoba amaqembu azaphutsha imidlalo ye Afcon esendaweni zakuqala ezintathu kuyiwo azakuyamela izwekazi kumidlalo yezizwe zomhlaba.

Sikhangele okwenzakale kusigaba seCastle Lager Premier Soccer League ngempelaviki edluleyo:

Iqembu le FC Platinum yilo eslihlezi phezu kwengalane yemiklomelo ngemva kokunqoba lelo ebelihlezi esiqongweni phambilini kwemidlalo yeviki letshumi lesithupha ele FC Platinum nge 2 ka 1 ngoMgqibelo.

Limpumela itshiye iqembu le FC Platinum lihlezi esiqongweni lilemiklomelo engamatshumi amane lanye kuthi ele Ngezi lisendaweni yesibili lilemiklomelo engamatshumi amathathu lathoba minwe mbili.

Endaweni yesithathu sekuleqembu le Triangle elinqobe ele Nichrut nge 1 ka nya ngoMgqibelo kuthi ele Highlanders lehle layahlala endaweni yesine ngemva kokunqotshwa ngele Bulawayo Chiefs nge 1 ka nya ngeSonto.

Zombili iTriangle le Highlanders zilemiklomelo engamatshumi amabili lathoba munwe munye iqembu ngalinye.

Amaqembu amane ahlezi emsileni wengalane ngabalisa ele Mutare City lele Bulawayo City wona alemiklomelo elitshumi lanye kanye lele Shabanie Mine lele Chapungu wona alemiklomelo elitshumi lantathu.

Facebook Forum

XS
SM
MD
LG