amalinks wokungena

Breaking News

Uzulu Uthi Kanti Vele uMnangagwa Udingani Kuhlelo Lwebholoho Elizaxhumanisa iZambia le Botswana?


Ibholoho

Uzulu uqhubeka esola uMongameli Emmerson Mnangagwa ngokuzisikela ehwahweni kuhlelo lokwakha ibholoho le Kazulungula elixhumanisa eleBotswana lele Zambia, elingasoze liphathise ilizwe leZimbabwe. Kulokwesabela ukuthi uma ibholoho leli lingaphela, lizadala ukuthi iZimbabwe ilahlekelwe yimali evela ezimoteni ezithwala imphahla ziquma elizweni zisiya emazweni la womabili.

UMongameli Emmerson Mnangagwa ubeyethekelele eKazungula kweleBotswana ngoMgqibelo, lapho avume ukuthi eleZimbabwe lingene kuhlelo lokwakha ibholoho, eliphakathi kweBotswana leZambia.

UMnangagwa ube ehlangane lobomongameli, uIan Khama we Botswana lo Edgar Lungu owe Zimbabwe lapho abakade beyekhangela ingqubelaphambili yohlelo lokwakhiwa kwebholoho, emngceleni weZambia leBotswana owe Kazungula.

Ngesikhathi kusungulwa uhlelo lolu ngomnyaka ka 2015, iZimbabwe yayala ukungena noma yayinxusiwe, isithi ayisiboni isizatho ngoba lapho okuzakwakhiwa khona ibholoho, akulamngcele lamazwe womabili.

Lesi kwakuyisikhathi owayengumongameli umnunzana Robert Mugabe engabonani ngalihlo lomongameli Khama.

Kodwa ukungena kukaMngangagwa esikhundleni sekuntshintshe umdlalo, iZimbabwe layo isingenile kohlelo lwebholoho olubiza imali ephose ibe yizigidi zamapula ezingamakhulu amathathu (P279million).

Ingcwethi kwezomnotho, zithi okwamanje uMnangangwa kumele ayetshela abaphathintambo kuhulumende kanye ledale lephalamende, ukuthi inzuzo izaphuma njani kuhlelo lolu lwebholoho…

"Yinto enhle, ngoba ngamazwe amathathu alomkhonomi ophezulu, kungabalwa eleSouth Africa. Into nje yikuthi sibuza ukuthi imali uzayithola njani. Njalo kumele atshengise iZimbabwe ukuthi izathola njani inzuzo kuloluhlelo.”

Uqhubeke njalo esithi ukuphuza ukungena kweZimbabwe, kuyenza ukuthi ingabi lamandla okukhuluma ngelizwi elizwakalayo ngoba izivumelwano zonke sezenziwa…

"Okunye yikuthi iZimbabwe ingena isiphuzile, ingalamandla kangako kuhlelo lolu, ngabe yahle yangena ekuqaleni."

Kukanti umnunzana Carlton Dube yena uthi iZimbabwe ingacina ilahlekelwe kuloluhlelo ngoba amaloli athwala imphahla angaqala ukungena eBotswana kulokusebenzisa umngncele weBeitbridge…

"Ngokwakhiwa kwebholoho lweKazungula yikutshengisa ukuthi bayingxenye yeSADC kodwa ngibona angathi ibhizimusi ingacina isuka eZimbabwe ingene eBotswana, ngenxa yokuthi ukwakhiwa kwebholo kuzaquma umango. Ngakho kumele bababone ukuthi udaba lolu baluphatha njani."

EleZimbabwe livunyelwe ukungena kuhlelo lolu, kusibanga sesibili sokwakha ibholoho, njalo amazwe womathathu avumelene ukuba lomgcele lapho okuyenziwa khona konke okuphathelene lokwenza ibhizimusi emazwe i one stop border post.

Uma seliphelile, ibholoho leli likhangelelwe ukuthuthikisa ibhizimusi kusiya kwamanye amazwe aseduzane kwala womathathu.

UMnangagwa uthi uyajabula ukuthi iZimbabwe isiphakathi kwaloluhlelo, lona olukhangelwe ukugqitshwa ngoMbimbitho womnyaka ozayo.

please wait

No media source currently available

0:00 0:03:23 0:00

Facebook Forum

XS
SM
MD
LG