amalinks wokungena

Uzulu Uthi Uyangiswe Yikulala KukaMugabe Emhlanganweni weUN


Amabandla aphikisayo sechothoze uMongameli Mugabe esithi uyangise ilizwe leZimbabwe ngokulala emhlanganweni weUnited Nations osaqhubekayo eNew York.

Amaphephandaba lemisakazo eminengi emhlabeni jikelele yethule imifanekiso kaMugabe ezitshayela isithongwana ngesikhathi kukhuluma uMongameli weMelika uMnu Donald Trump.

Sokuyinhlalayenza ukuthi uMugabe elale yiloba ngaphi lapho ahlala phansi khona.

Uzulu ophikisana lombuso weZanu PF laye uthukuthele ngemva kokubona imifanekiso ethethwe ngumsakazo weStudio 7 eveza indodana kaMugabe, uChatunga, ethwele izikhwama zempahla ayithenge esitolo esidulayo eseGucci eNew York.

Isitolo lesi sithandwa kakhulu njalo ngunina uNkosikazi Grace Mugabe.

UChatunga ngomunye wabantu abangamatshumi ayisikhombisa abahambe loMugabe emhlanganweni weUN ababikwa bephiwa inkulungwane eyodwa lengxenye yamadollar umuntu ngamunye ngelanga.

Lokhu kucunule abantu abanengi abathi uMugabe udlalisa imali kahulumende. Bathi vele ubengamelanga ahambe lemuli yakhe ikakhulu abantwana lomlamu wakhe kulumhlangano.

Indodana kaNkosikazi Mugabe yakuqala uRussel Gorerazara laye ucunule uzulu ngokuthenga imota ezimbili ezohlobo lweRolls Royce ngemali edlula iR70 million.

Obona ngokuqhutshwa kwenhlelo zeMDC ekhokhelwa nguMnu Welshman Ncube, uNkosikazi Rita Ndlovu, utshele iStudio 7 ukuthi ukulala kukaMugabe yibufakazi obukhomba ukuthi kasalungelanga ukuba nguMongameli.

Facebook Forum

XS
SM
MD
LG