amalinks wokungena

I-ECOWAS Itshayelwa Ihlombe Ngokuxotsha uYahya Jammeh weGambia Esikhundleni

  • Martin Ngwenya

Amabutho eSenegal engena eState House edolobheni le Banul eGambia.

Inengi labeZimbabwe lithi inhlanganiso yeSouthern African Development Community (SADC) kumele layo iqale ukuveza amazinyo, ilume ngemva kokuba inhlanganiso yeEconomic Community for West African States (ECOWAS), egoqela amazwe angentshonalanga kweAfrica iyenelise ukukhipha owaye ngumongameli eGambia, uMnunzana Yahya Jammeh, okade esefuna ukuyalela esihlwaleni.

Inengi lisele litshayela iECOWAS ihlombe ngemva kokuba inhlanganiso le yenelise ukunceda ukufaka umfutha ukuthi owaye ngumongameli weGambia, uJammeh atshiye isikhundla.

UJammeh kade esefuna ukwalela esikhundleni noma nje wanqotshwa kukhetho lwanyakenye ngosezathatha isikhundla sakhe umnunzana Adama Barrow.

UYahya Jammeh uvalelisa abalandeli bakhe eBanjul Airport, Jan. 21, 2017.
UYahya Jammeh uvalelisa abalandeli bakhe eBanjul Airport, Jan. 21, 2017.

Kodwa inhlanganiso ye ECOWAS yatshela uJammeh ukuthi ahlehlele uBarrow, ngoba uma kungenjalo bazangenela ngebutho. Leli linyathela elitshiye inengi lilesiqiniseko sokuthi inhlanganiso yeECOWAS iyaluma, kusenza beyiqhathanise lenhlanganiso yeSADC.

UMnunzana James Ndlovu uthi Isadc, ngaphandle kukamongameli Ian Khama weBotswana, iyehluleka ukuxazulula ingxaki zayo, ikakhulu uma kufika kuZimbabwe.

"Kuyadanisa, udubo olukhona eZimbabwe kade lulokhe luqhubeka, kulomuntu owadliwayo kukhetho ngo2008 kodwa wala ukuphuma esitulweni iSADC ayenzanga lutho."

Uthi ubungane obukhona eSADC obasungula kudala ngesikhathi sama Frontline States, yibo obenza ukuthi baphathane njengamaqanda bengafuni ukuchothozana.

"Ibhangela yikuthi iSADC ikhokhelwa ngamabandla aletha uzibuse, angeke bachothozane, bahlala bevumelana kuphela, kungaze kube ludaba olukhangelane lelizwe elicane njenge Lesotho, akula ofuna ukuphuma egcekeni."

Abantu ababalekela uYahya Jammeh owayesengasafuni ukusuka esikhundleni.
Abantu ababalekela uYahya Jammeh owayesengasafuni ukusuka esikhundleni.

Kukanti uJoel Phiri uthi kaboni iSADC intshintsha ngendlela eyiyo yona iyinhlanganiso yabangane nje kuphela.

"ISADC ikhutha ithuba lokuthi ikhangele inswelo zabantu bangezansi kweAfrica. Kungaze kungene inkokheli entsha efana lekamongameli Khama ezama ukuntshintsha indlela okusentshenzwa ngayo, bazithola beme bodwa bengelasekelo."

Abanye njalo bathi iSADC kumele izame ukuziguqula ukuze izinikeze amandla okuzama ukulungisa indubo zomhlubulo ingesabi ukuchitheka kobungane.

XS
SM
MD
LG