Inengi labantu lithi nxa izimali ezivela kwabamabhizimusi baseChina izanceda ukuthuthukisa ilizwe kayibuye kodwa kumele kuhlolwe izivumelwano lezi ukuze zingabulali ilizwe ngokulitshiya selilezikwelede ezingabhadalekiyo.
Ingcitshi kwezombusazwe, zithi uMnangagwa selezivumelwano ezinengi kakhulu athi zizalthuthukisa umnotho welizwe kusukela lapho egcotshwa ukuba ngumongameli kodwa inguquko elethwa yizo lokhe zingakayiboni. Abakubonayo yikuthi uMnangagwa akadingi mali yokuthuthukisa umnotho welizwe kuphela kodwa loncedo lokuqhuba ukhetho lwalonyaka ukuze iZANU PF inqobe.
Uhulumende ubikwa elobelane izivumelwano lamankampani akwele China alungisa imitshina yokwemba emigodini lokulima akhangelelwe ukuzotshala imali engangezigidi ezingamakhulu amahlanu zamadollar- $500 million eZimbabwe.
Abakhonona ngalezi zivumelwano bathi ababoni ukuthi ezikaMnangagwa zizaletha inguquko nanku ezazisenziwa ngowayengu mongameli Robert Mugabe zingalethanga bubelo lentuthuko eZimbabwe.
UMnangagwa okwakhathesi ukweleChina lapho anxuswe ngomunye wakhe walelo lizwe uMongameli Xi Xinping okwensuku ezinhlanu bexoxa ngendlela amazwe abo angancedana ukuthuthukisa lokuqinisa ubudlelwano kwezokuthengiselana lezomnotho.
