amalinks wokungena

Breaking News

UZuma Umiswa Emthethwandaba Esetheswa Icala Lokungethembeki


Owayengumongameli wakwele South Africa uMnu. Jacob Zuma usemthethwandaba edolobheni leDurban.

Owayengumongameli wakweleSouth Africa, uMnumnzana Jacob Zuma, ngoLwesihlanu umiswe phambi komthethwandaba weHigh Court eDurban esetheswa amacala enkohlakalo.

AbeZimbabwe abakhulume leStudio 7 bathi lesi yisibonelo esihle salokhu okufanele kwenziwe nguhulumende weZimbabwe kulowo owayengumongameli weZimbabwe uMnumnzana Robert Mugabe besithi laye ulamacala amanengi awenzayo esabusa.

UZuma ungene emthethwandaba ezihlekela njalo ephakamisa izandla ebingelela abasekeli bakhe.

Ngemva kwemizuzu emilutshwana abatshutshisi, abameli bakaZuma labenkampani yeFrance iThales layo eyetheswa amacala afanayo bavumelene ukuthi icala lidluliselwe mhlaka ziyisificaminwembili kuNhlangula.

Lokhu kwenzelwe ukupha uZuma ithuba lokuphikisana lokwetheswa kwakhe lamacala ayeke wawetheswa ngo2007 esulwa ngo 2009.

Uthe ephuma lapho uZuma watshela abalandeli bakhe ukuthi yena umsulwa kodwa izitha zakhe zimninda ngamacala.

“Alidedelwe icala liqhubeke uma lizoqhubeka ngoba amanga namangqina enyathi ebhekene neqiniso kuyobonakala.”

Ukuvela kuka Zuma emthethwandaba yinto esibabazwe linengi lezizalwane zeZimbabwe hatshi ngoba zisithi ulecala kodwa ngoba zithi kutshengisa ukuthi umthetho weSouth Africa awulandaba ukuthi odale icala ulasiphi isikhundla emphakathini.

Abanengike bathi lesi yisifundo esikhulu eZimbabwe ngoba owayengumongameli welizwe uMugabe laye kufanele ayebhekana lamacala eGukurahundi lenkohlakalo eyenzakala embusweni wakhe yatshiya ilizwe liguqe ngamadolo.

Isizalwane seZimbabwe uMnumnzana Bongani Nyathi ukuthi uMugabe ayejeziswa akusikho ukuthi kukhona omzondayo kodwa yikuthi ayechaza konke okonalaka ngaphansi kombuso wakhe.

“Lokho kuyamkhulula laye ukuthi akwazi ukuthi azikhulumele uhlangothi lwakhe njalo lalo iqiniso livele emphakathini. Ngoba kuzahlala kuthiwa umuntu othile wenza okuthile kanti akusinguye yedwa owakwenzayo kumbe njalo akusinguye owakwenzayo.”

Le yinto egcizelelwa ngesinye isizalwane seZimbabwe uMnumnzana Mlungisi Tshabalala yena othi kulobufakazi obunengi bokuthi abantu babulawa mahlayana ngesikhathi seGukurahundi eyayithunyelwe nguye uMugabe kwelemaNdebeleni ukuthi iyethanyela ingcekeza.

“Bekumele ukuthi bonke laba uMugabe, laboDabengwa, labo Mnangagwa bonke labo Perence Shiri besaphila kanje bebizelwe ecourt beyekhuluma iqiniso. Kubonakale ukuthi kahlekahle vele kuze kubulawe abantu aba more than 20, 000 or 30,000 or 50,000 abachithekelwa yimizi abanengi balahlekelwa akwaziwa ukuthi bakuphi ukuthi kwakwenzekeni.”

Ngakwelinye icele unobhala jikelele webandla leUnited Democracy Movement uMnumnzana Andrew Nyathi uthi asikho isizatho esibambekayo esingaphiwa nguhulumende weZimbabwe esokuthi yindaba uMugabe engasiwanga emthethwandaba.

“Laba bantu abafayo phakathi kwesikhathi sokubusa kuka Robert Gabriel Mugabe kumele kuchazwe enkantolo ukuthi bafa kwenzenjani bebulawelwani. Ukuthi yena kumbe usegugile hayi akusikho lokho thina esingakho. Kumele ayezigeza enkantolo kwazakale ukuthi yena hayi akalacala.”

Banengi abaqhubeka besola izivumelwano ezenziwa lomongameli Mugabe ngesikhathi esehla esihlalweni besithi lezo zivumelwano ezenziwa nguhulumende kaMnumnzana Emmerson Mnangagwa engazange athole imbono kazulu zizadala umkhuba omubi wokuthi omongameli beZimbabwe bazenzela santando bethembe ukuthi abasoke bathonisiswe loba sebephumile ezikhundleni.

Facebook Forum

XS
SM
MD
LG