Umqeqetshi weqembu elimela ilizwe emdlalweni wenguqu elama Warriors uSunday Chidzambwa ujabuliswe kakhulu yikufinyelela kweqembu leli kusigaba se semi – final kumncintiswano we Cosafa oqhutshelwa elizweni le South Africa kulezinsuku.
UChidzambwa, okhethwe ukuba ngumqeqetshi weqembu lelizwe kumncintiswano we Cosafa kungensuku ngaki ukuba lumncintiswano uqale, utshayele ihlombe abadlali beqembu lama Warriors ngokwenelisa kwabo ukunqoba iqembu le Swaziland ukuze bafinyelele ukuyadlala kusigaba se semi – final eyomncintiswano we Cosafa.
“Ngiyajabula ngendlela esidlale ngayo ikakhulu ngehlandla lakuqala elomdlalo lapho esibelamathuba ambalwa okuhlohla. Ngehlandla lesibili elomdlalo sighube kanzima kodwa ngiyathokoza ngoba senelise ukunqoba. Okwamanje angifuni ukukhuluma ngomdlalo we final ngoba khona sizadlala leLesotho ku semi – final njalo akwaziwa okungenzakala kulowomdlalo.”
Iqembu leZimbabwe lizadibana leleLesotho ngoLwesine njalo iqembu elizanqoba kulowomdlalo lizadibana lelizanqoba phakathi kwe Zambia le Tanzania ku final.
Kolunye udaba olumayelana lomdlalo wenguqu iqembu leNgezi Platinum yilo elihlezi phezu kwengalane yemiklomelo kusigaba se Premier Soccer League ngemva kwemidlalo yeviki letshumi lesithupha.
Abafana be Ngezi banqobe abe FC Platinum nge 2 ka 1 ngempelaviki edluleyo njalo sebelemiklomelo engamatshumi amathathu lanye (31).
Endaweni yesibili kuleqembu le Dynamos lona elinqobe ele Bantu Rovers nge 2 ka nya njalo lilemiklomelo engamatshumi amabili lathoba munwe munye (29). Iqembu le Dynamos lilakho ukundiza liyehlala phezu kweqembu le Ngezi nxa lingaphiwa imiklomelo eyomdlalo ongasafikanga komlindi uyacina eliwudlale leqembu le Chapungu emavikini edluleyo njalo omiswe ngoba sekuwe igedi iqembu le DeMbare livele likhokhela ngamagoli amane.
Endaweni yesithathu kuleqembu le Black Rhinos lona elilemiklomelo engamatshumi amabili lathoba minwe mbili njalo lilingene ngemiklomelo lamaqembu abalisa ele Chicken Inn lele Highlanders.
Abafana be Black Rhinos babe ngutshiki lobhanqa 1 ka 1 leqembu le ZPC Kariba kuthi abe Chicken Inn banqotshwe nge 2 ka nya ngabe Chapungu ikanti iqembu le Highlanders linqobe ele Yadah nge 1 ka nya.
