Iqembu le Highlanders likhangelelwe ukuphakama ngeSonto lilubhekise kwele South Africa lapho elizaqeda insuku ezimbalwa lizilolonga lisedolobheni lePolokwane.
Ekhuluma lentathelizindaba ngoLwesine emini umsekeli kamqeqetshi weqembu le Highlanders, uAmin Soma-Phiri, uthe bakhangelele ukuhamba labadlali abakade bengatholi ithuba lokudlala mihla yonke nyakenye ukuze bebabone ukuba lonyaka bengaqhuba njani.
Inengi labantu esizahamba labo ngabantu abakade bengadlali ngoba nxa sisiya dlala ngale asilandi kuyadlalela ukunqoba kodwa sifuna ukubona ukuba bangadlala ndima bani kuqembu lethu lonyaka.
Iqembu le Highlanders liphutshe imidlalo yalo nyakenye likundawo yesithathu engalaneni yemiklomelo njalo uSoma – Phiri uthi okwamanje abangeke bathembise abalandeli babo ukuba lonyaka bazaphakamisa isicoco ngoba belokhu bephakathi kokubumba iqembu.
Ukuphakamisa isicoco kuya ngokuthi iqembu liyabe liqhube njani amalungiselelo alo. Okwamanje iqembu lethu kalikayeneli sisalinde umqeqetshi ukuba silungisise okuthile. Angingeke ngitsho ukuba lonyaka sizadlala njani ngoba thina kasilawo amandla awokuthenga abadlali njengamanye amaqembu.
Umqeqetshi weqembu le Highlanders uErol Akbay ufike namhla kwele Zimbabwe evela kibo eHolland lapho abeyephumula ekhona ngemva kokuba imidlalo yanyakenye isifike emaphethelweni.
Ekuphendukeni kwalo kwele South Africa iqembu le Highlanders likhangelelwe ukuba lidlale lele FC Platinum emdlalweni we semi-final eyenkezo yeZNA Charities.
Kolunye udaba olumayelana lomdlalo wenguqu; iqembu le Cameroon lizangqikilana lele Egypt ngeSonto kufinal yomncintiswano we Africa Cup of Nations oqhutshelwa elizweni le Gabon kulezinsuku.
Iqembu le Cameroon likhulele eleGhana ngoLwesine kusigaba se semi - final kuthi ele Egypt lona linqobe ele Burkina Faso ngoLwesithathu ukuze lifinyelele ku final.
Iqembu le Ghana lele Burkina Faso azadibana kusasa ngoMgqibelo kudingwa iqembu elizaphutsha imidlalo yalonyaka likundawo yesithathu.
Sikhangele umdlalo werugby;
Kusasa ngoMgqibelo umncintiswano we Matabeleland Rugby Football Board Under-21 Cup uyafika emaphethelweni njalo amaqembu azangqikilana ku final ngathi ele Old Miltonians Under-21 kanye lele Highlanders Panthers Under - 21.
Lumdlalo uzadlalwa ngehola lesine emini yantambama ikanti phambilini kwawo kuzakuba lomdlalo wokudinga iqembu elizaphutsha umncintiswano likundawo yesithathu lapho iqembu le Bulldogs Under-21 elizadlala khona lele Matabeleland Warriors Under-21.
Imidlalo izaqala ngehola letshumi lambili lapho iqembu le Nyambose elizadibana khona lele All Stars kuthi ngemva kwawo kuzakuba khona umdlalo ozadlalwa ngamaqembu abesifazane ozakuba phakathi kweqembu le Nyambose Ladies lele Police Bulldogs.
