Kwezemidlalo sixoxe lokaputeni weqembu le Bantu Rovers uBukhosi Sibanda, onguye umdlali oselitshayele emambuleni kanengi kusigaba se Premier Soccer League.
Iqembu le Bantu Rovers lingabe liqhuba nzima kumidlalo yalonyaka eyesigaba se Castle Premier Soccer League njengoba linqobe kabili phakathi kwemidlalo eyisikhombisa kodwa ukaputeni walo uSibanda yena utshaya kuzwele njengoba kunguye umgadli oselitshayele emambuleni kanengi emidlalweni esidlalwe lonyaka.
UmfokaSibanda, owaziwa kakhulu ngegama lokusoma elithi Zakhu, ulamagoli ayisikhombisa njalo nguye obengumdlali wakuqala ukuhlohla kathathu emdlalweni owodwa lapho iqembu le Bantu Rovers libhaxabula ele Yadah nge 7 ka 2.
“Ngithabe kakhulu njalo ngibonga abanye bami ngoba bengingasoze ngiyihlohle ihat-trick aluba bebengasebenzi kanzima. Le yi-hattrick yami yakuqala selokhu ngaqala ukudlala iprofessional football. Leyi ivele kuNkulunkulu kanye lokusebenza kanzima.”
UZakhu uzelwe mhla zingamatshumi amabili lane kunyanga kaZibandlela ngomnyaka ka 1997 okutsho ukuba uleminyaka engamatshumi amabili eyokuzalwa.
Umsekeli kamqeqetshi weqembu le Bantu uJoseph Sibindi uthi lumdlali engabe esasengumfana kodwa ubukhokheli yisipho azalwa laso okokuthi akasoze aphazamiswe yikubhalwa asekwenziwa zintatheli.
“Lumfana ubukhokheli wazalwa labo. Uziphethe kahle njalo uyalalela nxa ecetshiswa. Sizazama ukumphathisa lathi ukuze aziphathe kuhle nxa esenkundleni lalapho esephandle.”
UZakhu uthi isifiso sakhe yikuba eqhubekele phambili ehlohla njalo ukunqoba abakwenze iqembu le Yadah ngamagoli amanengi kuzabapha isibindi njengeqembu.
“Kusipha isibindi ngoba besesihlohlwe kakhulu emidlalweni yethu elandelwe yilo. Ngizaqhubeka lami ngihlohla ukuze singayali siliqembu elihlohle kalutshwana lona lihlohlwe kanengi ngoba lokhu kungasiphathisa phambili.”
Uluhlu lwabadlali asebelitshayele emambuleni kumidlalo yalonyaka eyesigaba se Premier Soccer League luveza ukuba uBukhosi Sibanda ulamagoli ayisikhombisa kuthi abamlandelayo ngabahlohle kathathu ababalisa uAbbasi Amidu oweqembu le CAPS United, uDaniel Chakupe owe ZPC Kariba, uMkhokheli Dube, oweqembu le Bulawayo City kanye lo Prince Dube oweqembu le Highlanders.
