Owaye ngumdlali wenguqu odume edlalela iqembu leHighlanders lelimela iZimbabwe elamaWarriors, umuyi uWillard Khumalo ubekwe ngoLwesine emalibeni e Lady Stanley lapho izikhulumi zikhale ngempilo yokuhlupheka ephilwa ngabadlali laba ngemva kokutshiya lumdlalo sebesiya phumula.
Bekukhalwa kodwa kuthakazelelwa njalo impilo kamuyi enkonzweni eqale eholu yeMcDonald’s eMzilikazi, kwayiwa enkundleni yeBabourfields anduba kuyiwe emalibeni.
Izikhulumi zibabaze ubungcitshi bukamuyi owadlalela iqembu leHighlanders lelesizwe kanye lamanye agoqela iGermany zisithi akuzwisiseki ukuthi umuntu olubuciko obungaka kungani edlule kulumhlaba engumuntu oswelayo okutshengisa ukuthi abadlali bakuleli abaphathwa ngendlela eyiyo.
Umnemwabo kamuyi uMnumzana Brian Khumalo uthi akuzwisiseki ukuthi umnewabo obelobuciko obungaka ubengabhadalwa ngendlela eyiyo okumdabukisayo yena ngoba wayevame ukumtshela ukuthi kwesinye isikhathi wayengahlawulwa imfanelo zakhe lanxa wayeqhubeka edlala ngenxa yokuthanda lumdlalo.
Amazwi akhe agcizelelwe ngunobhala jikelele we nhlanganiso ekhangela inhlalakahle yabadlali , iFootball Union of Zimbabwe, uMnumzana Paul Gundane, othi umuyi waba ngeyinye yensika ekubumbeni linhlanganiso ngemva kokunanzelela ukuthi ayikho inzuzo ebambekayo abayitholayo ngezipho abalazo abazisebenzisela ilizwe.
Ekhuluma emele abangane, owake wadlala laye uRahman Gumbo, uthi udangele emphefumulweni kodwa uthokoziswa yikuthi umuyi ubeselokuthula emphefumulweni wakhe ngemva kokuthola usindiso alungise impilo yakhe okuyikho isiqokoqela.
Umlandeli wenguqu, uMnumzana Japhet Mloyi, ohambe ukuyavalelisa umuyi uthi ilizwe lilahlekelwe kakhulu ngoba nanku kuhamba izinsizwa obekumele zibe zifundisa abasakhulayo ubungcitshi obudingakalayo
Bayakhala ye, kodwa uthi bayathakazelela impilo yejaha elisuke laphanga ukuhamba. Uthi kubekuhle ukuthola ithuba lokuzavalelisa umdlali olodumo akade emthakazelela ngensuku zakhe.
Omunye njalo obesemngcwabeni, uMnumzana Gift Maphosa uthi inani labantu elizekulumbuthano litshengisa ukuthi umuyi ubeliqhawe likazulu. Uthi malanga wonke bayezwa kuthiwa abantu abathile baphiwe izicoco zobuqhawe, lamhla uzulu wakoBulawayo kanye labezenguqu bamethesile uKhumalo lesisicoco ebesivele simfanele.
Umuyi owazalwa ngomnyaka ka 1966 ubhubhe ngoMgqibelo ngemva kokuqinelwa ngumkhuhlane wetshukela. Abaze emngcwabeni wakhe bebegoqela umphathintambo wezemidlalo uMnumzana Andrew Langa, ababengabadlali oNorman Mapeza, Moses Chunga kanye labaqeqeshi oMisheck Chidzambwa.
Umuyi ubekwe eLady Stanley lapho okwabekwa abanye bakhe o-Adam Ndlovu, uMercedes Sibanda kanye lo Benjamin Nkonjera.