amalinks wokungena

Breaking News

'Amapholisa Kawahlolisise Okwenziwa NguMfundisi uWalter Magaya Okuthiwa Udlwengula Abesifazana'


UMfundisi Walter Magaya.

Abenhlanganiso ezilwela ilungelo labesifazane lamantombazana, angaphansi komanyano weWomen’s Coalition of Zimbabwe, bakhuthaza amapholisa ukuthi abumbe ikhomitshini ezacubungula uMfundisi Walter Magaya kulandela imbiko yokuthi udlwengula abesifazane abangamalunga endawo yakhe yokholo lweSiKhristu eyeProphetic Healing Deliverance abesebafumbathisa ukuthi bengamvezi.

Abe omen Coalition Zimbabwe bathi sokusobala ukuthi lanxa abesifazane bengaveza okuyabe kubehlele baphanga batshedele muva sebelandula lokho abayabe bekutshilo ngaphambilini.

Lokhu kwenzakala kulemfanekiso esisabalele enkundleni yeWhatsapp etshengisa umuntu ofana loMagaya osecansini lomunye owesifazane ongasemkakhe.

Emazwini abo kuntathelizindaba afundwe ngumgcinisihlalo weWomen’s Coalition, uNkosikazi Ronika Mumbire, bathi kuqakathekile ukuba abaphatheke kwezokulondolozwa kwelungelo loluntu bamanyane emsebenzini wokudingisisa okuyikho okwenzakalayo ngoMagaya labesifazane ebandleni alikhokhelayo.

Lokhu kusekelwe nguNkosikazi Michelle Gudo osebenza njengomcebisi kwezokulinganiswa kwamathuba phakathi kwabesilisa labesifazane, uGender Advisor ngeSingisi, kunhlanganiso yeWomen’s Coalition Zimbabwe.

Lumsakazo kawusanelisanga ukukhulumisana Mfundisi Admire Mango, isikhulumeli sikaMfundisi Magaya, obengadobhi incingo zakhe zikamakhalekhukhwini loba ukuphendula imibuzo yama whatsapp esimthumele yona.

Asebethe baveza indaba zabo zokudlwengulwa nguMagaya babalisa umuyi owafela eBotswana ngendlela ezingazwisisekiyo, uNkosazana Chipo Chakanyuka, uNkosazana Petronella Donhodzo, olodaba olwalusemthethwandaba waphanga waguqula ingqondo wathi hatshi kadlwengulwanga, labanye abathi uAngela Charakupa, Nomsa Ruvazhe, Charity Dlodlo loSarah Maruta.

Umanyano we Women’s Coalition ucele amapholisa lenhlanganiso ezibalisa eyeZimbabwe Gender Commission, Zimbabwe Human Rights Commission, Zimbabwe Anti-Corruption lezinye ukuthi zenze umsebenzi wazo wokudingisisa ukuthi kuyini okwenzakalayo.

Bacele njalo amalunga edale lephalamende ukuba kube lendlela inkokheli kumabandla ezokholo okumele izilandele ukulondolozwa kwelungelo loluntu emabandleni ezokholo.

Njalo bacele wonke owesifazane owadlengulwa nguMagaya ukuba bangesabi ukukuveza okwenzakalayo ukuze athole usizo olwaneleyo.

Udaba Esilethulelwe NguMavis Gama
please wait

No media source currently available

0:00 0:03:32 0:00

Facebook Forum

XS
SM
MD
LG