Odokotela abasanda qeda izifundo ekade bemele baqalise umsebenzi mhlaka 1 kulinyanga lokhe bengakaqalisi ngoba bephikisana lohulumende ngecontract abamele bayisayine.
Bathi sebezame ukukhulumisana logatsha lweHealth Service Board kanye lomphathintambo wezempilakahle uMnu David Parirenyatwa kodwa akulalutho oluphumayo.
Okunye abakhonona ngakho yikuthi icontract yabo ayibavumeli ukuba ngamalunga enhlanganiso ezimela izisebenzi kanti njalo odokotela besifazana abaphiwa iholo labo ngokugcweleyo nxa bethe baya ku-maternity leave.
Uhulumende uthi nxa odokotela laba befuna alungisise izikhalazo zabo kumele basayina amacontract abo kuqala, kodwa bona bayakwala lokhu besithi konke abakhala ngakho akulungisiswe kuqala.
Sehlulekile ukukhulumisana lomgcinisihlalo wogatsha lweHealth Service Board uMnu Lovemore Mbengeranwa lomphathintambo wezempilakahle uMnu David Parirenyatwa.
Kodwa ummeli wedale lephalamende uNkosazana Thabitha Khumalo uveze ukudana ngodaba lolu esithi uhulumende kumele alulungisise ngokuphangisa odokotela laba baqale umsebenzi.
