Ibandla leZapu lenze umhlangano emavinkilini eHomestead, eKezi ngeSonto lakhuthaza abantu abangakabhaliseli ukuvota ukuthi babhalise ukuze benelise ukuvota kukhetho oluzayo.
Umgcinisihlalo walelibandla eMatabeleland South, uMnu. Mathew Sibanda, utshele izakhamizi ukuthi zikhuthaze izihlobo, abantwana kanye labangane abakwamanye amazwe ukuthi labo bazebhalisela uhlelo lolu lungakavalwa.
“Nxa ungayanga vota uyabe ungatshengisanga amalungelo akho ngento oyisolayo ongayithandiyo ngezinto ezenziwa nguhulumende obusayo,” kuchasise uMnu Sibanda.
Esinye isakhamuzi esingene lumhlangano, uMnu Similo Nyathi uthe njengesigaba esahlaselwa ngumbhuqazwe weGukurahundi, abanye kabasoze benelise ukubhalisa ngoba bengela zithupha kathi njalo inengi liphandle kwelizwe.
Umhlangano weZapu lo ungenwe ngabantu abambalwa njalo uyingxenye yemihlangano yalelibandla eyokukhankasela ukhetho oluzakwenziwa maduze nje.
Uhlelo lokubhalisa abantu abazavota obeluqhutshwa yikomishini yokhetho, iZimbabwe Electoral Commission lapho ebijonga khona uzulu ezigabeni zonke zelizwe lufike emaphathelweni kumaviki amabili edluleyo.
Kodwa abangakabhalisi bayenelisa ukuyabhalisa emawofisini alikomishini atholakala kuzo zonke izabelo zelizwe lanxa nje abanengi bekhala ngomango.