Iziphathamandla zeZCTU eziyisikhombisa zibotshwe mhla ka 11 Mfumfu nyakenye besetheswa umlandu wokwephula isigaba 37(1)(a) somthetho we Criminala Law ( Cordification and Reform ) Act.
Abatholakale bengelacala babalisa umkhokheli walenhlanganiso umnumzana Peter Mutasa, unobhala wayo umnumzana Japhet Moyo, uBenice Maluleke, u Prescilla Jonhi, uSimon Mutasa, uMunashe Chirovamari kanye lo Ezekiel Matema.
Unobhala jikelele weZCTU, umnumzana Japhet Moyo uthi bazoqhubeka ngomsebenzi wokummela izifiso lezikhalazo zamalunga.
“Kuveza sobala ukuthi inhlanganiso imela iqiniso isiyaqhubekela njalo phambili isenza umsebenzi wayo wokumelela amam members iphikisana lama policies esiwabona ukuthi athathela ama members ethu imali.
Kuzasinika njalo ithuba lokuthi siqalise lathi ukwenza umsebenzi wethu ngokuthi ukuba sise ma court nsuku zonke kade kusithathela isikhathi esinengi.”
Uqhubeke ethi abethuswa yikubotshwa kwabo kwanyakenye lokuzolandela u Moyo.
“Sile responsibility esayinikwa ngama members ukuthi sibamelele sizaqhubekela phambili sisenza njalo loba sizabanjwa njalo sizimisele ukuba siqhubekele phambili sisenza umsebenzi wethu. Kodwa ke esingazisa abantu yikuthi isikhathi sethu sichithiwe okunengi okumangalisayo, sihambe okufika 15 times sisiya e court kunyenga ezidlulileyo besenzela nje ukuthi singaze senza umsebenzi wethu ngokulungileyo.”
Ekwethuleni isinqumo sakhe sokubakhulula, uMantshi u Mugwagwa ukubeke sobala ukuba uhulumende wehlulekile ukubeka sobala icala eladalwa ngabayisikhombisa laba watsho wathi labafakazi abangapholisa awe Zimbabwe Republic Police bayatsho ukuba ukutshengisela kwezizalwane kuvunyelwa langumthetho omkhulu welizwe oyisisekelo sombuso.
Utshilo njalo uMantshi ukuba azikho izibonelo ezikhomba ukuthi laba bantu babefuna ukubangela udlakela kakhulukazi nxa kukhangelwa ukuba linkokheli yabotshwa isemahofisini e ZCTU ngesikhathi ilungiselela ukuphatheka kulokho kutshengisela okwakuqoqiwe mhla lokho.
Wengeza ethi lamapholisa afumana amabhakana ayelotshwe imibiko engalunganga ehluleka ukuwaqondanisa labeZCTU njengoba kwaswelakala ubufakazi obukhomba ukuba nguphi phakathi kwabo owayephethe liphi ibhakana.
Abayisikhombisa laba bebemelwa ngamagqwetha abalisa umnumzana Kossam Ncube lo Alec Muchadehama abasebenzisana labenhlanganiso yamagqwetha alwela ilungelo loluntu eye Zimbabwe Lawyers for Huma Rights – ZLHR.
