amalinks wokungena

Breaking News

Zibe Ngutshiki Lobhanqa 2 ka 2 Phakathi kweMushowani Stars leFC Platinum


Iqembu leFC Platinum
Iqembu leFC Platinum

Iqembu lomdlalo wenguqu elingene lonyaka esigabeni saphezulu ese Castle Lager Premier Soccer League, ele Mushowani Stars libe ngutshiki lobhanqa 2 ka 2 lentshantshu zanyakenye iqembu le FC Platinum emdlalweni oqhutshelwe esigodlweni iHarare ngoMvulo emini.

Abahlohlele iqembu le Mushowani Stars ngu Blessing Phiri kanye lo Evans Katema kuthi abalitshayele emambuleni abeqembu le FC Platinum ngu Elvis Moyo kanye lo Never Tigere.

Limpumela itsho ukuba iqembu le FC Platinum selitshiywa ngemiklomelo emibili ngamaqembu abalisa ele Chicken Inn kanye lele Hwange wona okuyiwo womabili kuphela asenqobe kuyo yonke imidlalo emithathu esidlalwe lonyaka kusigaba se PSL.

Iqembu le Chicken Inn yilo elihlezi phezu kwengalane lilemiklomelo eyithoba munwe munye okulinani eliphethwe liqembu le Hwange kodwa abafana be Chicken Inn bahlezi phezulu ngoba behlohle amagoli ayisikhombisa bahlohlwa kanye ikanti abe Hwange bahlohle amagoli ayisithupha bahlohlwa kabili. Iqembu le FC Platinum lihlezi endaweni yesithathu lilemiklomelo eyisikhombisa.

Kusenjalo amaqembu alandelwa ngabanengi elizweni athi ele Dynamos kanye lele Highlanders aqhubekela eqhuba nzima njengoba womabili ekhe phansi emidlalweni yangempelaviki edluleyo.

Iqembu le Dynamos litshaywe nge 2 ka nya ngele Chicken Inn kuthi iqembu le Highlanders lona linqotshwe nge 3 ka 1 liqembu le Harare City.
Limpumela itshiye iqembu le Dynamos lilemiklomelo emithathu kusithi ele Highlanders lona lilemiklomelo emibili ngemva kwemidlalo emithathu.
Iqembu le Highlanders libhekane lodubo olokuba abadlali balo bakhalale umsebenzi ngesikhathi kulungiselelwa ukuqala kwemidlalo yalonyaka njalo umqeqetshi walo uMadinda Ndlovu uthi ukungadlali kwabo kuhle kuyisibonelo esokuba kabalungiselelanga ngemfanelo.

"Iqembu le Harare City lisikhulele njalo ngizaphinda ngitsho njalo ukuba ukungalungiseleli ngemfanelo imidlalo yalonyaka yiyo imbangela eyokungadlali kuhle kwethu. Impumela le iyisibonelo esokuba asingeke siqhube kuhle nxa singalungiselelanga ngemfanelo njalo ifana lecilongo elikhala litshela wonke nje olilunga laleliqembu ukuba kumele sivuke emaqandeni".

Emdlalweni walo olandelayo iqembu le Highlanders lizadlala lele Triangle lona elilemiklomelo emine ngemva kokunqoba kanye, laba ngutshiki lobhanqa kanye, lanqotshwa emdlalweni owodwa.

Sikhangele umdlalo kakhilikithi.
Iqembu elimela ilizwe le Zimbabwe liphindisele ukuvinjelwa ukuyadlala kumidlalo eyokudinga intshantshu zezizwe zomhlaba ezaqhutshelwa elizweni lase Ngilandi lonyaka elakwenziwa ngele United Arab Emirates nyakenye ngokutshaya leliqembu lezivakatshi kumidlalo emithathu eyohlobo lwe One Day International.

Kusele umdlalo owodwa ozadlalwa yilawa maqembu ngoLwesibili okutsho ukuba ele Zimbabwe yilo eselinqobile loba lingaze linqotshwe emdlalweni lo ozaqhutshelwa enkundleni ye Harare Sports Club.

Emdlalweni wakuqala odlalwe ngoLwesithathu olwedluleyo iqembu le Zimbabwe linqobe ngama wickets ayisikhombisa kwathi kowesibili odlalwe ngoLwesihlanu linqobe ngama runs amane kuthi kowesithathu odlalwe ngeSonto linqobe ngama runs alikhulu lamatshumi amathathu lanye (131).

please wait

No media source currently available

0:00 0:02:42 0:00

XS
SM
MD
LG