amalinks wokungena

Zibihla Okuzwisa Usizi Izihlobo Zika Itai Dzamara Owathunjwa Ngo2015

  • Mavis Gama

UNkosikazi Benhilda Dzamara, umama kaItai Dzamara, lomka Dzamara, uNkosikazi Sheffra Dzamara.

Abosendo lukaMnu. Itai Dzamara, abangane labalwela ilungelo loluntu bathe gwaqa ngoLwesine emagcekeni eFreedom Square eHarare bonanza ilanga lokuthunjwa kuka Dzamara, owenhlanganiso ye Occupy Africa Unity Square, owanyamalala mhlaka 9 ngoMbimbitho, ngomnyaka ka2015.

UDzamara ucatshangelwa ukuba wathunjwa ngamapholisa asebenza nsitha ngesikhathi ekhankasela ukuba uMongameli Robert Mugabe asuke esikhundleni.

Inhlanganiso yakhe ifuna uMugabe asuke esikhundleni isithi seyehlulekile ukuqhuba umsebenzi ngemfanelo.

Umculi uShingisai Suluma, ngomunye wabacule emkhosini lo.

Lanxa beze bebalutshwana emkhosini lo, izihlobo zikaDzamara ebezikhona ezibalisa umfowabo, uPatson, kanye lonina uNkosikazi Benhildah Dzamara, bathi bazaqhubeka bemkhumbula kanye lokudinga impendulo ngokunyamalala kuka Itai.

Bekuzinyembezi zodwa kunina lo Patson, kuveza ubuhlungu ababuzwayo okwenze behluleka lokukhulumisana lentathelizindaba, ngokufuthelwa.

Ubekhona lomkhokheli we #ThisFlag movement, uMfundisi Evan Mawarire, owethule amazwi wokuqinisa immuli kaDzamara lokukhuthaza uzulu weZimbabwe, kakhulukazi abasakhulayo, ukuba basukume balungise ilizwe labo.

UNkosikazi Sheffra Dzamara, umka Itai Dzamara, lomama kaItai, uNkosikazi Benhilda Dzamara, labanye akade besemkhosini wokukhumbula uDzamara owathunjwa ngomnyaka ka2015.
UNkosikazi Sheffra Dzamara, umka Itai Dzamara, lomama kaItai, uNkosikazi Benhilda Dzamara, labanye akade besemkhosini wokukhumbula uDzamara owathunjwa ngomnyaka ka2015.

UMnu. Charles Nyoni, omunye wabasebenza loDzamara, uvumelane lenkuthazo kaMawarire, yokuthi uzulu weZimbabwe kasukume alwisane lalokho okuhluphayo elizweni.

Uthe akumelanga inkokheli yamabandla leyabaphikisa uhulumende kaMugabe idonsele muva ngesikhathi abantu bezama ukulwisana lohulumende ongabananziyo.

Lokhu kusekelwe ngosakhulayo uLeopold Munende othe kumele uhulumende amveze uDzamara ephila kumbe ebhubhile.

Lanxa ungazange waphazanyiswa ngamapholisa lumkhosi, ake abonakala ayincosana, ehamba ngemota, obekusobala ukuba bekuyindlela yokwethusela uzulu ukuba ehluleke ukuphatheka kiwo.

Ukuthunjwa lokunyamalaliswa kuka Dzamara ngabacatshangelwa ukuba kwenziwa ngabasebenza nsitha, kuqhubeka kusolwa kakhulu zinhlangothi zonke zempilo elizweni okubalisa abamawofisi abameli bamazwe ehlukeneyo eZimbabwe.

Embikweni yokunanza usuku lapho uDzamara anyamalalayo, abewofisi yommeli weMelika labenhlanganiso yomanyano wamazwe awe Europe batshengise ukukhathazeka ngokunyalala kwakhe.

Bakhuthaza iziphathamandla ukuba zitshengise ukuzinikela kwazo, ekulondolozeni ilungelo lezizalwane zeZimbabwe njangalokho okumunyethwe yisisekelo sombuso.

Facebook Forum

XS
SM
MD
LG