amalinks wokungena

Breaking News

Zidlela Evalweni Izisebenzi eZimbabwe Ezivalelwe Ezindlini Ilizwe Lilwisana Lomkhuhlane weCoronavirus


Ziyakhala izisebenzi kwele Zimbabwe.
Ziyakhala izisebenzi kwele Zimbabwe.

Zihlalele evalweni izisebenzi ezinengi eZimbabwe zisesaba ukuphelelwa yimisebenzi ngesikhathi zihlezi emakhaya phansi kweziqondiso zohlelo lukahulumende olwe lockdown emizameni yakhe yokwenqabela ukumemetheka kwegciwane leCoronavirus.

Ngakwelinye icele, abanikazi bamankampani labo bakhala ngokuthi babhekane lenkinga ezimbalwa njengoba umsebenzi wokulungisa impahla abangazithengisa bathole inzuzo umile ngenxa yohlelo lukahulumende olwe lockdown.

Lokhu kwenzakala ngesikhathi eleZimbabwe limanyane lamanye lamazwe emhlabeni wonkejikelele ekunanzeni usuku oluqakathekisa izisebenzi olwe International Workers’ Day. Lonyaka lunanzwe phansi kwesihloko esithi ‘Stop the Covid-19 Pandemic, Scale Up Social Protection & Dialogue, Save Jobs and Pay a Living Wage ‘.

UMnu. Sikhumbuzo Sibanda, isakhamuzi saseHarare, ngomunye wabahlalele evalweni.

“Kube kanti laye uhulumende futhi kancedisanga. Akucaci ukuthi uncedisa njani kumbe uncedisa baphi abamabhizimusi ukuthi bengawavali lokuthi izisebenzi zingalahlekelwa yimisebenzi. Ngabe into yakhona iyacaca ukuthi esingathi yiku khushinwa ukuthi amabhizimusi la aqhubeke engavalwa izisebenzi ziqhubeke zilemisebenzi ”.

Unobhala wenhlanganiso yezisebenzi eyeZimbabwe Congress of Trade Unions, uMnu. Japhet Moyo, uthi zithwele nzima izisebenzi ngales’isikhathi.

“Akukacaci phela ukuthi bangaki abangalahlekelwa yimisebenzi ekupheleni kokuvalelwa lokhu. Asikwazi lokuthi ilockdown le izaphela nini. Kuba nzima-ke ukuthi sitsho ngales’isikhathi ukuba ekupheleni kwayo mingaki imisebenzi engavalwa, kuyaba nzima sibili ukuthi sibekwazi okwamanje. Lokhe simelele sibona nje ukuthi kuhamba ngayiphi indlela.”

Umkhokheli wenhlanganiso yabasomabhizimusi labaqatshi eyeEmployers Confederation of Zimbabwe, uMnu. Israel Murefu, uthi isifiso sabaqhatshi yikubona izisebenzi zibuyela emisebeninzini ekupheleni kweLockdown.

“Sikhumbule ukuba kungumlandu wabo abaqhatshi ukuhlawula lezi zisebenzi njalo kungasinjongo yabo ukuba zilahlekelwa yimisebenzi lezi zisebenzi. Kungaphezu kwamandla abaqhatshi lokho nxa kuthe kwenzakala ngoba kuyabe kungasi ntando yabo ukuba kube njalo. Sekubangelwe yi-lockdown kanye lomkhuhlane ukungasebenzi kuhle kwalawo mankampani.”

UMongameli emmerson Mnangagwa uthi uhulumende wakhe uzimisele ukutholisa izisebenzi iholo elingaziphilisa kodwa esehluleka ukwenza lokho ngenxa yezizatho ezimbalwa ezigoqela ukuqonga kwesisindo semali yakwamanye amazwe.

XS
SM
MD
LG