amalinks wokungena

Liyakhuphuka Inani Labacula NgesiNdebele

  • Joseph Njanji

Bayanda abacula ngesiNdebele kwele Zimbabwe.

Ezomculo kweleMaNdebeleni besezisalele emuva eminyakeni edluleyo ngoba belihlekana abaculi abakade bekhwaza kuzwakale.

Kodwa intathelizindaba esebenzela edolobheni lakoBulawayo, uSindiso Dube, uthi ngomnyaka ka2016 kulabaculi abambalwa abatshaye kwaduma ilizwe lonke.

Kubaculi abaqanjwa ngumfoka Dube uKhuliyo ukhiphe idlalade lakhe lakuqala elibizwa ngokuthi ‘Amaphupho Amatsha’ lona elivuselela ingoma abanengi abakhula bezicula ebutsheni babo.

Usaziwayo ogqoka amabhatshi ambalwa kwezokuthokozisa uzulu, uBabongile Skhonjwa, yena osebenzela umsakazo wakoBulawayo owe Skyz Metro FM, uthi ukuba khona kwalumsakazo kuphe ithuba abanye abaculi ukuba bazakale emphakathini.

Lonyaka abaculi bakoBulawayo bahlanganise amakhanda baqoqa umdlalo omkhulu oqhutshelwe enkundleni ye White City Stadium wona obuhlose ukukhumbuza abantu ngemisebenzi yabaculi bakudala abafana labo Solomon Skuza, oNdux Malax, Themba Ndlovu, Busi Ncube labanye.

Omunye wabaculi bakulezinsuku otshengisele ikhono lakhe mhla kusenziwa umdlalo eWhite City nguye uBabongile Skhonjwa yena onyikinyise inkundla ngengoma zakhe ezigoqela ethi ‘Khonapho Khonapho’.

Ikusasa lomculo wesiNdebeleni ikhanya ithembisa kakhulu nxa kukhangelwa uhlonzi lwemisebenzi yabaculi abasakhulayo abafana lo Skaiva yena osehluphile kulezinsuku ngengoma yakhe ethiwa ‘Imali Yeqolo’.

XS
SM
MD
LG