Kuhlanganwa koBulawayo enkundleni ye White City ngoMgqibelo lapho okuyabe kuthe gwaqa khona abahlabeleli abatshiyeneyo abagoqela umhlabeleli olodumo uThemba Ndlovu yena owaduma umhlaba wonke jikelele ngeculo lakhe elithiwa Meet Me In Zimbabwe.
Likhonsathi ephiwe igama elithi ‘We Honour Our Music Legends’, ikhangelelwe ukuqala ngehola lesibili emini ngoMgqibelo isiyaphela ngehola lesithupha ekuseni ngeSonto.
Umculi uJeys Marabini ngomunye wabaqoqi balikhonsathi njalo uthi injongo yabo ngeyokunanza lokukhumbula imisebenzi yabaculi abaphamise ezomculo kweleMandebeleni kusukela kudala.
“Bonke nje abaculi bakithi ongabacabanga yibo esibakhumbulayo sibanikeza inhlonipho ukuthi umsebenzi abawenzayo umkhulu kakhulu ngoba sinjenje thina sibonele kubo ngakho sithatha imisebenzi yabo siwuse phambili ukuze abasemuva kwethu labo bafunde kithi umculo wakithi ungafi.”
Abaculi abalodumo asebadlula emhlabeni ababalisa oSolomon Skuza, uNdux Malax, uDon Gumbo kanye lo Martin Ndlovu labo bazananzwa kulumcimbi njalo kukhona amaqembu azacula ingoma zabo ndawonye lezabanye abaculi abadabuka kwelemaNdebeleni asebehlala phandle kwelizwe.
Kuzakuba khona njalo abaculi abadla ubhedu kulezinsuku abagoqela iqembu le Iyasa, DJ Mzoe kanye lo Clement Magwaza oweStambo Sami.
Umkhokheli weqembu le Black Umfolosi, uSotsha Moyo, laye ongomunye wabaqoqi bekhonsathi, uthi uzulu wako Bulawayo kumele abuye ngobunengi azozibonela ukudla kwamehlo.
“Bakithi lingesabi lutho ngoba isecurity iyabe itight njalo okudliwayo lokunathwayo kuyabe kugcwele ngentengo ephansi yikho libuye ngobunengi benu.”
Abadala bazehlukana lamadola amabili ukuze bangene enkundleni kuthi abantwana bazabhadala idola elilodwa. Abantwana abagqoke iunifomu yesikolo bazehlukana le 50 cents ukuze bangene enkundleni ikanti ku VIP kuyabe kungenwa ngamadola alitshumi.
Abaculi bako Bulawayo bahlezi bekhala ngokuba abaphiwa amathuba njalo ikhonsathi ye ‘We Honour Our Music Legends’ iza ngesikhathi kulokukhonona phezu kwemibiko ethi lonyaka kubizwe abaculi base Harare emcimbini we Kalawa Homecoming owenziwa ekupheleni komnyaka lapho okuza khona abaculi be South Africa ukuzotshaya koBulawayo.