amalinks wokungena

Breaking News

'Abadabuka Kwamanye Amazwe Badala Amacala Amanengi eSouth Africa'


Sokulokuxokozela okumangalisayo kwele South Africa ngabantu bokuza ngemva kokuba isiphathamandla sebandla elifusayo eleAfrican National Congress (ANC) wesabelo seGauteng, uMnu. David Makhura, ethe abavela kwamanye amazwe badume ngamacala athile njalo sebebanengi kakhulu ezibhedlela okokuthi izibhedlela kazisasebenzi ngemfanelo.

UMakhura uthe, “Ngikhathazekile ngokuthi kumacala athile kulezizalwane zakwamanye amazwe okwaziwayo ukuthi yizo eziwadalayo. Kulabaziwayo ukuthi yibo abathengisa izidakamizwa. Kubekhona abadala amacala alodlakela okugoqela ukubulala lokutshontsha ezimoteni ezithwala imali.”

Amazwi kaMakhura asetshiye umphakathi udabukene abanye besithi ukhuluma iqiniso kanti-ke abanye bathi yinkulumo eyingozi.

Odabuka kwele Zimbabwe, uMnu. Sipho Dube, uthi le yinkulumo yokuzama ukuzidingela amavoti ekhethweni oluzayo.

“Angeke kuthi abantu beganga kuthiwe ngabantu bangaphandle loba ngabangaphakathi. Umuntu uyisigangi eyedwa hayi ngokuthi ubuyaphi loba kwenzenjani. Ngoba singathi siyabheka lakhonapha eSouth Africa bakhona vele izigangi ezinengi.”

Kodwa-ke omunye njalo odabuka kwele Zimbabwe, uMnu. Mfanelo Sibanda, uthi liqiniso elaziwayo ukuthi inkunzi eyesabekayo ebanjwa ngitsho libalele emalokitshini agoqela iHilbrow, Berea le Yeoville yenziwa ngabadabuka eZimbabwe. Uthi kufanele abenza lokho bazinuke amakhwapha hatshi ukwala ukusolwa bona besona.

Kusehlakalo, esenzeke lonyaka sokubulawa kwamalunga emuli ayisitshiyagalombili, abetheswa leli cala ngabadabuka eZimbabwe.

Owayengumphathintambo wogatsha lwezamapholisa, uMnu. Fikile Mbalula, waveza ukuthi abaqambula imota ezithwala imali behlomile ngababengamasotsha eZimbabwe.

Kanti-ke umphathintambo wogatsha lwamapholisa, uMnu. Bheki Cele, uthi imbiko yababulele umlingisi owaziwayo uSibusiso Khwinana bemthathela umakhalekhukhwini wakhe elokitshini leSoshanguve ngeviki ephelileyo ukhombisa ukuthi kungaba ngabakwamanye amazwe.

Umgcinisihlalo weAfrican Diaspora Forum, uMnu. Vusumuzi Sibanda, uthi abaphikisani lalokho okutshiwo nguMakhura ngoba ubengasoli abokuza bonke kodwa ekhuluma ngobufakazi obuphuma emapholiseni lasezibhedlela.

Kulabanyeke abathi besabela ukuthi ukuphindwa phindwa kwalezi inkulumo ikakhulu yiziphathamandla zeANC kanye leDemocratic Alliance kusazoqhubeka njengoba kuyisikhathi sokulungiselela ukhetho bese kucina kudala ukuhlaselwa kwabantu bakwamanye amazwe.

Udaba Esilethulelwe NguBenedict Nhlapho
please wait

No media source currently available

0:00 0:03:25 0:00

Facebook Forum

XS
SM
MD
LG