Kungxoxo ephathelane lezifundo ebiqoqwe ngumsakazo weVoice of America kumaviki ambalwa edluleyo ekolitshini leGeorge Washington University ebigxile kwabadabuka kwamanye amazwe abalesifiso sokufunda eMelika, ingcwethi ebezikhona ziphe amacebo athile lokuveza inhlupho abangabhekana lazo.
Okunye kokuphume kulingxoxo kugoqela amacebo okuthola imali yokubhadalela indleko yokufunda eMelika lokukubeka mgceke ukuthi abafundi bazabhekana lobunzima obuthile njengabantu abayabe besuke emakhaya abo okulemikhuba lempilo eyehlukeneyo leyeMelika, bangacabangi ukuthi kuzoba butshelezi sikhathi sonke kodwa kumele baqinisele bekhangele abazokuthola emaphethweni ezifundo zabo.
UNkosazana Andile Nobuhle Mpofu, osanda kugqiba izifundo zakhe eziphathelane lezamabhizimusi ekolitshini leGeorge Washington State University eMelika, uyajabula ngethuba alitholileyo empilweni lokuzafunda kuleli lizwe.
Kulomehluko na phakathi kokufunda kweleMelika lokufunda eZimbabwe?
UMaMpofu uthi umahluko okhona yikuthi nxa uqalisa ukufunda eMelika amathuba akhona okuthi ungatshintsha izifundo ngokuhamba kwesikhathi.
Uqale efunda izifundo zokuhlolisisa imicabango yabantu wasetshintsha wenza okubhekane lezamabhizimusi.
UMaMpofu uphinde waphatha udaba lomahluko okhona phakathi kwamasiko abantu beZimbabwe labeMelika.
Uthe indlela yokuhlonipha likuphila itsheyene kakhulu ngenxa yokuthi abantu beZimbabwe bayahlonipha okumangalisayo kwezamasiko lokunye okufanayo.
UNkosazana Tanya Nyathi, esinye njalo isizalwane seZimbabwe esisanda kugqiba izifundo eziphathelane lezokuba yintathelizindaba ekholitshini le University of Columbia eMelika, uvumelana lombono kaMaMpofu, ikakhulu kwezamasiko esithi ngempela atshiyene kakhulu.
“Indlela yokuxoxisana kwabantu abaleminyaka etshiyeneyo kwele Melika itshiyane lendlela yokuxoxisana eZimbabwe. Isiluleko enginganikeza kuyikuthi kwele Melika umbalisi oseklasini, uzakutshela ukuthi umbize ngegama lakhe hatshi ukuthi umbize ususithi mnumzana noma nkosikazi kumbe nkosazana. Ngombono wami lokho kuhambisana ngalendlela ephathwa ngayo amalungelo abantu kweleMelika.”
UMaNyathi uphinde waphatha udaba lokukhetha kahle ikholitshi lapho umuntu afisa ukuyafunda khona.
Uthi abantu kumele babelolwazi oluthile mayelana lokuthi ikolitshi ozolikhetha lisesimeni esinjani njalo ukuthi lizakusiza na emfundweni yakho.
Ukutholakala kosizo lwemali yokuhlawulela izifundo ngolunye udaba oluthwalise abantu nzima kakhulu kwele Melika nxa kungumuntu odabuka kwelinye ilizwe.
Kodwa uMaNyathi uthi usizo lukhona ngempela ungadinga kahle. Isibonelo luhlelo lwe James M. Manyika Fellowship olwaqaliswa yisizalwane eseZimbabwe, esinceda izizalwane zeZimbabwe lezinye ezilesifiso sokufunda ekolitshi leHarvard.
