amalinks wokungena

'Akwenziwe Indawo Zokudlalela Zabakhubazekileyo'

  • Mavis Gama

Abaphila lobugoga bafisa ukuba lendawo zokwelula imizimba.

Uhulumende uxwayiswa ukuba enze kubelendawo zokudlalela ezingasetshenziswa ngabakhubazekileyo njengoba ezikhona okwamanje zingabalungelanga.

Lokhu kuvezwe emkhosini wokunanza usuku lokuqakathekiswa khona okuphathelene lezemidlalo yokuzilibazisa emhlabeni jikelele olwe World Play Day ngaphansi kwendikimba ethi ‘You Have A Right To Play’ olunanzwe ngempelaviki ngabantu abatshiyeneyo eZimbabwe.

Lumkhosini owenzelwe esikolo seQueen Elizabeth Girls High School eHarare ubuqoqwe ngabogatsha lwezemidlalo besebenzelana labenhlanganiso ebona ngokuqhutshwa kwenhlelo zokulwisana lokusabalala kwegciwane lengculaza eye National AIDS Council in Zimbabwe (NAC).

Lanxa belijabulela leli langa ummeli wabakhubazekileyo edale lephalamende, uSenator Anna Shiri, uthi kunengi okusamele kwenziwe ukugcwalisa izifiso lendingeko zabo.

UNkosikazi Shiri uthi kumele kungapheleli ekubatholiseni indawo zokudlalela kuphela kodwa lempahla yakhona eyokusebenzisa okufana lenqola zama wheelchair zokusebenzisa kweminye yale midlalo.

Esinye seziphamandla zenhlanganiso ye-Zimbabwe Association for the Sport of the Blind, uNkosikazi Chipo Chikwature, ukhala ngesimo esibi esiselizweni.

Osekelwe nguMnu. Elphot Moyo, okhubazekileyo laye osebenza labaphila lobugoga eye Danhiko Project, ukhala njalo ngempahla esetshenziswa ngabanjengaye esithi iyasilela elizweni.

Abe NAC bathethe lelithuba ukuhlola abakade befisa ukwazi isimo sabo kwezokuba balegciwane na loba hatshi kanye lokutholiswa imfundiso kwezokusabalala kwegciwane.

Lumkhosi wangempelaviki, owenzelwe eQueen Elizabeth Girls High School, ubungowokwandulela omkhulu ozakwenziwa mhla ka 28 Nhlangula, eMberengwa.

Facebook Forum

XS
SM
MD
LG