amalinks wokungena

Breaking News

'Akulunganga Ukuthi Abantwana Bangene Imihlangano yeZanu PF Ngenkani'


Inhlanganiso ye #This Constitution Our Constitution Campaign ithi akulunganga ukuthi abantwana babanjwe ngamandla ukuthi baye emhlanganweni webandla leZanu PF.

Inhlanganiso ekhokhela umkhankaso wokulondolozwa kwesisekelo sombuso eye #This Constitution Our Constitution Campaign ithi umphathintambo wezemfundo uDokotela Lazarus Dokora kumele engavumeli ukuthi ibandla elibusayo lisebensise izifundi kwezombusazwe.

Inhlanganiso le ithi akulunganga ukuthi izifundi zithwalwe ngezimota kumbe zibanjwe ngamandla ukuthi zingene imihlangano yebandla leli lamanye ezombusazwe.

UMqondisi we #This Constitution our Constitution koBulawayo, uNkosikazi Abigail Nyampambi, uthe umphathintambo wezemfundo kehlukane lomkhuba wokuvumela ibandla elibusayo ukubamba ngamandla abafundi ukuya emihlanganweni yezombusazwe.

UMongameli webandla leMatabeleland Republic Party, uMnunznana Mqondisi Moyo, uthe kulinyathelo elihle okwenziwa ngabomkhankaso we #This Constitution our Constitution ngoba iZanu PF ilomkhuba omubi wokukhipha abantwana ezifundweni ukuthi bayelalela okukhulunywa yiziphathamandla zebandla leZanu PF.

Isikhulumi sebandla leZAPU, uMnunzana Iphithule Maphosa, uvumelane loMoyo esithi ibandla elibusayo lephula amalungelo abafundi kanye labazali.

Isakhamuzi seGwanda, uMnunznana Langton Mpofu, ugcizelele esithi kuyabahlukuluza ukuthwalwa kwabantwana besiwa emihlanganweni yezombusazwe.

UMsekeli kaMongameli wePDP, uMnunzna Kucaca Phulu, laye usole kakhulu isenzo lesi esithi basasebancane abantwana ngakho-ke mabangabanjwa ngamandla ukuya emihlanganweni yezombusazwe.

IZimbabwe ilungiselela ukuqhuba ukhetho ngomnyaka ozayo njalo imihlangano yezombusazwe iyazakala ukuba izakwanda, kodwa uMongameli Robert Mugabe eseqalele ukwenza imihlangano labasakhulayo kodwa kumihlangano aseyenzile abafundi babanjwa ngamandla ukuya kiyo.

Udaba Esilethulwe NguMavis Gama
please wait

No media source currently available

0:00 0:03:59 0:00

Facebook Forum

XS
SM
MD
LG