Inhlolisiso esanda kuqhutshwa ngabenhlanganiso elwela amalungelo lenhlalakahle yabantwana, eye Zimbabwe National Council of the Welfare of Children, iveza ukuba amankazana amanengi enziwa yibuyanga ukuba athengise imizimba yabo.
Abenhlanganiso ezisebenzisana lozulu bethesa uhulumende umlandu wokwehluleka ukuthuthukisa umnotho welizwe osokudale ubuyanga obukhulu elizweni kwenza ukuba kubelokuqansa kwenani labaphila ngokuthengisa imizimba.
Lenholisiso eqhutshwe ngokusebenzelana lenhlanganiso ezibalisa eye National AIDS Council le PROGRESSIO, iveze njalo ukuba inengi labaphatheka kwezokuthengisa ucansi kungamantombazana amancane okumele ukuthi ngabe asesikolo.
Kodwa ngenxa yokuswela imali, basuke behluleke ukwenze njalo bacina sebengabaphatheka kundlela ezingalunganga zokuziphilisa.
Omunye wabaphatheke kulenhlolisiso njalo ekhokhela uhlangothi lwezokuhlelwa kwenhlelo enhlanganisweni ye ZNCWCZ, nguMnu. Maxim Murungweni.
UMurungweni uthe indlela kuphela engaluqeda loludubo yikulungisiswa kwesimo somnotho elizweni, uzulu athole okokwenza, abantwana ikakhulu amantombazana, benelise ukubuyela esikolo.
Abomanyano wenhlanganiso ezisebenzisana lozulu, eye Crisis in Zimbabwe Coalition, labo babeka uhulumende okhona manje umlandu wokwehluleka ukuthuthukisa umnotho welizwe.
Lokhu bathi yikho osokudale ubuyanga obukhulu kuzulu kwafuqa abantu ukuqhuba imisebenzi engaqedekaliyo njalo engalunganga ebalisa ukwanda kwabaphila ngokuthengisa ucansi.
Isikhulumeli senhlanganiso le, uMnu. Dumisani Nkomo, uthe uhulumende okhona eseyehlulekile ukunanza okufiswa nguzulu.
Abamele inhlanganiso lezi bavumelene ukuthi okwenzakalayo lokhu kungaqedwa yikuguqula umnotho weZimbabwe osubhidlike okumangalisayo.