Impumela enhle yenhlolisiso yokusebenza kwe sigombolozi esiziwa ngokuthi yi Dapivirine ring kumbe vaginal ARV ring, isilethe intokozo kungcitshi zescience ezithe gwaqa eDurban zikhanda amacebo okuthi lingalwiswa kanjani ingciwane elibangela ingculaza.
Lesi sigombolozi, esisetshenziswa ngabesifazana ngokusifaka esithweni sangaphansi, silomuthi owenqabela ukuthi amagciwane engculaza aqhubeke esanda kumbe ezalana lomunye umuthi ovimba lawo azama ukungena kowesifazana.
Inhlolisiso eyenziwa kwabesifazana abedlula izinkulungwane ezine (4500) emazweni abalisa iZimbabwe, iSouth Africa, iMalawi leUganda, iveze ukuthi lesisigombolozi sivikela ukuthelelwa kowesifazana leli gciwane ngesilinganiso sokungamatshumi amathathu ekhulwini (30%).
Isiphathamandla senhlanganiso ye IPM eyiyo ekhokhela inhlelo zokulungiswa kwalo umuthi, unkosikazi Annalene Nel utshele amanxusa aseDurban ukuthi baphakathi kwenhlelo ezizakhokhelela ekuthini inhlanganiso yezempilakahle emhlabeni jikelele yemukele ukusetshenziswa kwalesi sigombolozi ngabesifazana.
“Inhlolisiso ezimbili esazenzayo zonke zaphuma lempumela efanayo. Zombili zakhombisa ukwehla kokuthelelwana kwegciwane kulabo abebesebenzisa igigombolozi lesi. Limpumela isize kakhulu ukuthi siqale ukukhulumisana lenhlanganiso zezempilakahle ngalo umuthi. Ngaphezukwakho konke sithokoziswe yikuthi lumuthi kawulangozi kwabesifazana abawusebenzisayo,” kusho uNel.
Lesi sigombolozi sihlala esithweni sikamama okwenyanga abesesikhupha efaka esinye. Inhlolisiso itshengisa ukuthi kasiwi njalo asiphazamisa inhlelo sezambuzini lezocansi.
Labesifazana beZimbabwe sebemukele ngezandla zombili lumzamo wokuvikela abesifazana ekutholeni leli gciwane. Umgcinisihlalo wenye inhlanganiso elwela amalungelo abesifazane eye Zim IMbokodo unkosazana Victress Mathuthu uthi yena ufisa ukuthi kungacithwa sikhathi ukuvunyelwa kokusebenza kwalesi sigombolozi.
UMathuthu uphinde wathi, bangajabula ma kungaba yinto engashesha iphangise ukwenzeka ukwenzela ukuthi omama bavikeleke. Kuyinto enhle ukutholakala kwalesi sigombolozi. Sikushayela izandla singomama lokho.
Ngokutsho kogwalondaba lwenhlanganiso ye AVERT, epha ulwazi ngodaba lwengculaza, ngo 2015 bekulabantu abedlula isigidi abaphila legciwane lengculaza eZimbabwe (1.4 million). Ibika njalo ukuthi ingxenye yabesifazana abaphila ngokuthengisa ezocansi eZimbabwe balegciwane legculaza.
Ngalo umnyaka abesifazana abebephila legciwane le ngculaza elizweni bebephosa befike isigidi (790,000).
