amalinks wokungena

'Amabandla Aphikisa iZanu PF Kumele Adinge Abatsha Abangavota Ngomnyaka Ozayo'


FILE -Abanye abantu abavota ngomnyaka ka2013 eZimbabwe.

Abasakhulayo bakhuthaza amabandla aphikisayo eZimbabwe ukuthi baqakathekise ukubhalisa ukuvotisa ontanga ikukhulu labo abazavota okwakuqala kukhetho lomnyaka ozayo.

Lokhu kuvezwe emhlanganweni obuqoqwe yinhlanganiso yeFredrich Ebert Stiftung (FES) Alumni ngoLwesibili eHarare wokufundisa abatsha ngokuqakatheka kokubhalisa ukuvota lokulungela ukuthatha izikhundla emakhansilini lasedale lephalamende ngomnyaka ozayo.

Umqondisi we FES Alumni eZimbabwe, uMnumzana Pride Mkono, uthi njengabatsha kabasoze begoqe izandla lona uhlelo lokubhalisa ukuvota soluqala.

UMnumzana Gift Siziba, obekhona laye emhlanganweni lo, uthi sokuyisikhathi sokuthi amabandla aphikisayo angene emaphandleni ngoba kulapho okulodubo lwabontanga abavota bengela lwazi.

Okade emele ontanga abasemakolitshini njalo engumkhokheli wenhlanganiso emela izifundi eye Zimbabwe National Students Union (ZINASU), uMnumzana Alister Pfunye, uthi njengabafundi bafuna ukuthi kube lenhlelo zokubhalisa emakolitshini.

Ingcitshi ebona ngembali yelizwe leZimbabwe, uMnumzana Tjenesani Ntugwa, uthe kuyajabulisa ukuthi abatsha sebekubona ukuqakatheka kokufundisa lokulimukisana ngezokhetho.

Inhlanganiso yeFES yakweleGermany ibona ngemfundiso egoqela ezemvelo, ezabatsha azabesifazana lezezisebenzi.

UMongameli Robert Mugabe wazise ukuba uhulumende usungula uhlelo lokubhalisa ukuvota kusukela mhla ka 14 Mpandula kusiya ku 15 Zibandlela womnyaka ozayo.

Kodwa ibandla eliphikisayo eleMDC-T lithi alivumelani lakho lokhu ngoba iZimbabwe Electoral Commision (ZEC) kayikatholi imitshina eneleyo eyamaBVR ukuthi abantu babhalise.

Kusenjalo, abeMDC-T ngoLwesithathu babuthanise abantu abalabazali abathuthela eZimbabwe abalezithupha ezibhalwe aliens okutsho ukuba ngabokuza ukuthi bancediswe ukulungisa izithupha ukuze benelise ukuvota njengelungelo lumuntu wonke weZimbabwe aliphiwa yisisekelo sombuso.

Facebook Forum

XS
SM
MD
LG