Ababalisi abakunhlanganiso yeAmalgamated Rural Teachers Union (ARTUZ) ngoLwesine benelisile ukunika uMnu. Mthuli Ncube, umphathintambo wezemali, ugwalo lwezikhalazo ezigoqela ukuthi baphiwe iholo labo ngedola leMelika.
Ababalisi laba, abahambe ngenyawo besuka edolobheni leMutare mhlaka 9 ngoMpalakazi betshengisela, bafike eHarare ngoLwesine.
Omunye, uNkosazana Sukoluhle Ndlovu owesiqintini seBubi esabelweni seMatabeleland North, uthe lobanje behlangane lenhlupho ezithize kuhambo lwabo besuka eMutare besiya eHarare benelisile ukutshiya incwadi yezikhalazo zabo kuNcube.
“Sihambele ukuthi imali yethu ibhadalwe ingama United States dollars hatshi ama bond notes. Sihlangane lenkathazo ezinengi kakhulu ezafina lomumo womkhathi lokubotshwa ngamapholisa. Sabotshwa eMarondera sakhululwa. Sifike namuhla eHarare lapho esiphe isicelo sethu kuNcube”
Omunye njalo walaba babalisi uNkosikazi Christine Jubane owe Bulilima uthe bazaphenduka mhlaka 7 ngoZibandlela ukuzelala emahofisini kaNcube nxa izikhalazo zabo zingagcwalisiswanga.
“… Nxa sibekezelele umango ungange 275 kilometers sizabekezela sihlezi lapha aze asizwe. Okubuhlungu yikuhamba hatshi ukuhlala phansi.”
Ngemva kokuhlabela lokugiya okwamahola amabili ababalisi laba benelisile ukutshiya incwadi yabo ku Mthuli Ncube yezikhalazo ezimbalwa.
