amalinks wokungena

Breaking News

Uzulu Uhlutshwa Yikukhuphuka Kwenani Lababamba Igcikwane Lengculaza koBulawayo


Izakhamizi zakoBulawayo zithi zikhathazekile ngombiko oveza ukuba kulokukhuphuka kwenani labantu abathelelwa igcikwane lengculaza edolobheni leli.

UMqondisi wohlangothi olubona ngenhlelo zokuvimba ukuthelelanwa kwengculaza olweNational AIDS Council (NAC) emhlubulweni weMaNdebeleni, uNkosikazi Senatra Nyathi, uthi sebebhekane lodubo lokuthi inani labantu asebethelelwe igcikwane lengculaza liyakhula njalo inengi labo ngamantombazana amancane asengene kubhizimusi lokuthengisa amacansi.

UMqondisi wenhlelo zehlanganiso elwela amalungelo oluntu kwezebhizimusi lamacansi eyeSexual Rights Centre (SRC), uMnumzana Mojalifa Mokoele, uthe lokhu kuyethusa kakhulu njalo inengi labantu sebengene ekuthengiseni amacansi.

Uthe lokhu kutshengisa ukuthi abantu abesabi ukubamba umkhuhlane lo njalo lokhe bengafuni ukusebenzisa ijazi lomkhwenyana.

Ukhuthaze inhlanganiso ezibona ngezempilakahle ukuba zikhuthaze ukusetshenziswa kwejazi likamalukazana ngoba obaba bengafuni ukuzivikela.

UNkosikazi Barbra Moyo, owayekubhizimusi lokuthengisa amacansi okweminyaka engamatshumi amabili osewaqala uhlelo lokufundisa omama ukuba baziphathe njani kubhizimusi yokuthengisa amacansi esebenzelana leSRC, uthe wonke umuntu edolobheni lakoBulawayo kafundiswe ngokuzivikela kugcikwane leli.

Inhlanganiso yeNAC isikhuthaze labo abangakabambi umkhuhlane kodwa besesabela ukuthi bengawubamba ukuba bayedinga amaphilisi abavikela ukubamba igcikwane legculaza ezibhedlela eziseduze labo ukuze inani lababamba umkhuhlane lehle.

XS
SM
MD
LG