amalinks wokungena

Kwenziwa Umhlangano Wabantu beZimbabwe leBotswana Owezomvikela

  • Martin Ngwenya

Ilizwe leBotswana lithi inkomo zeZimbabwe zilakho ukuletha imikhuhlane elizweni leli.

Izizalwane zeZimbabwe labanye babo bakwele Botswana baphakathi komhlangano wamalanga amathathu wezomvikela kanye lokuhlalisana phakathi kwamazwe womabili.

Umhlangano lo wenziwa ngesikhathi kulokufuthelana phakathi kwamazwe womabili, kulendaba ezinengi ezikhathaza ikakhulu abantu abavela kwele Zimbabwe.

Umhlangano okhangele ezomvikila kanye lesimo sokuhlaliseka phakathi kwamazwe womabili- owe Joint Commission On Defence and Security- usungulwe eGaborone ngoMvulo.

Abaphathintambo bezomvikela bamazwe womabili kanye lezinye inkokheli kuhulumende zingena lumhlangano.

Umhlangano uza ngesikhathi kuloku futhelana phakathi kwamazwe womabili ikakhulu udaba lokudutshulwa kwenkomo zeZimbabwe ezingena eBotswana.

IBotswana ithi inkomo lezi ziletha umkhuhlane womlomo lamasondo okulimaza ukuthengisa kwenyama kumkambo weEuropean Union.

Kuviki edluleyo elinye ilunga ledale lephalamende eBotswana ucele uhulumende ukuthi avuselele udaba lokwakha ucingo lukagetsi emngceleni oyehlukanisa amazwe womabili.

Lokhu kuza ngesikhathi izakhamizi ezisezigabeni duze lomngcele weZimbabwe ziqhinqa isililo ngokuthi inkomo zabo ziyadutshulwa.

UMnu. Riger Ngwenya osebenza kweleGaborone kodwa edabuka esigabeni seSanzukwi duze leBotswana, uthi usanda kulahlekelwa zinkomo.

"Okudanisayo yikuthi ngilahlekelwe zinkomo ezidutshuliweyo njalo ngizame ukukhulumisana losabhuku esigabeni kodwa bangitshela ukuthi lolu ludaba lukahulumende."

Uqhubeke esithi kumele iZimbabwe leBotswana kumele sikhulumisane phezu kwaloludaba oluzadala ukungezwani phakathi kwamazwe womabili.

"Silokukhathazeka ukuthi inkomo zethu esithembele kizo sezidutshulwa.
Siyabuza ukuthi akulandlela ohulumende bamazwe womabili abangakhulumisanga ngayo ngoba lokhu sekuphehla ukungezwani."

Emhlanganweni okhona eGaborone kubikwa amazwe womabili azimisele ukukhipha okusesifubeni, iBotswana ikhonona ngokungena kwabeZimbabwe okungekho emthethweni, isithi lokhu sekusiba nzima ukuthi uhulumende eyenelise ukunakekela izizalwane zakhe.

IZimbabwe layo kubikwa izafuna ukucasiselwa kahle ngodaba locingo lukagetsi kanye lokuhlukuluzwa ikakhulu balabo abangena eBotswana okungekho emthethweni.

Facebook Forum

XS
SM
MD
LG