amalinks wokungena

Abangena kweleBotswana Kungelamvumo Babhekane Lengwenya Lamasotsha

  • Martin Ngwenya

Zithwele nzima izizalwane zeZimbabwe ezingela maphepha okuhlala kwele Botswana.

Izizalwane zeZimbabwe ziqhubekela phambili zibhekane lobunzima ngesikhathi zizama ukungena kwele Botswana ngemva kwekhefu leKhisimusi.

Imfula egcweleyo eyinye ilengwenya, amasotsha alinda emngceleni ngeminye yemigoqo ebhakane lalabo abeZimbabwe abazama ukuphindela eBotswana ngemva kokuchitha ikhefu lezihlobo labangane ekhaya.

Umfula uLimpopo uyaziwa ngengozi zengwenya kanye lokugalula kusukela kudala kulabo ababezama ukweqa besiyadinga imsebenzi kwele South Africa.

Ngokufanayo abangena eBotswana baqhubeka bebhekane lobunzima ngenxa yokuthi abalamaphepha aqondileyo okungena komakhelwane.

Abeqa imfula efana labo Ramokgwebana kanye loShashe basemlonyeni yengwenya kumbe ukugalula ngesikhathi imfula igcwele.

Abayenelisayo ukuchapha akutsho ukuphela kodubo lwabo ngoba amasotsha ahlomileyo aweBotswana ebhoda bhoda emngceleni.

Ukubanjwa kutsho ukuphanga ukubuyiselwa ekhaya ngokuphazima kwelihlo, kodwa abanye baqala bayevalelwa esitokisini kumbe ukubhuqwa ngemvubu emhlane.

UNkosikazi Mary Nleya uthi, “Akulula endleleni. Sizo dinga impilo kodwa uze ufike emsebenzi wakho ufika uzwile. Yikuchapha imfula egcweleyo kusiya ekubhekeni ulaka lwamasotsha.”

Manje kungani bengazami ukudinga amathuba ekhaya kulokufaka impilo zabo engozini? “Silezimuli okumele sizinakekele ekhaya lawe uyazi ukuthi akuphileki amathuba emsebenzi asenciphe kakhulu. Ngokunjalo asila ngeyinye indlela ngaphandle kokuphuma sizodinga okukuziphilisa.”

EleBotswana liqhubeka lisomisa ukungena ikakhulu kwabavela eZimbabwe benikezwa amalanga amalutshwana emngceleni, njalo bezingelwa ngabomvu ezitaladeni emadolobheni atshiyeneyo ikakhulu bangahlala kudlulise kumbe bengela maphepha.

Kodwa noma kunjalo abeZimbabwe abakutshayi ndiva, beqhubeka buthululeka beyimhlambi.

XS
SM
MD
LG