amalinks wokungena

Breaking News

IBotswana Izama Ukulungisa Umthetho Wokubisela Izibotshwa Emazweni Azo


Umthethwandaba weMagistrates' Courts eGaborone, kwele Botswana.

Idale lephalamende lakweleBotswana likhangelelwe ukuphuma lomthetho oqondisa ukuba izibotshwa zakwamanye amazwe, okugoqela ezeZimbabwe, zibuyele ukuyaqedisa ukupika emajele emazweni azo.

Kulabe Zimbabwe abadlula amakhulu ayisikhombisa abasemajele eBotswana..

Umphathintambo wezomvikela kweleBotswana, uMnu. Shaw Kgathi, ukhangelelwe ukwethulwa edale lephalamende udaba lokuthuthiswa kwabasemajele phakathi kwamazwe alezivumelwano.

Idale lephalamende likhangelelwe ukudlulisa loludaba lube ngumthetho ozabona amazwe entshintshana izibotshwa, zibuyela emajele asemazweni azo omdabu.

IZimbabwe kanye leBotswana zaqala ukukhulumisana phezu kwaloludaba emhlanganweni owenziwa minyaka yonke phakathi kwamazwe womabili owe Joint Permanent Commission on Defence and Security owenzelwe eVictoria Falls nyakenye.

UKgathi uke watshela iStudio 7 ngaphambilini, ukuthi ukuthuthiswa kwabasemajele kwenzelwa ukuthi babe seduze lezihlobo zabo, njalo kwehlise isisindo sokugcina izibotshwa kwelinye ilizwe.

"Njengamazwe akuSADC, siyakhulumisana ngendaba ezifana lalezi, njalo lokhu kwenzelwa ukuthi kwehlise isisindo kulizwe eligcine izibotshwa kukanti kwenzelwa ukuthi izibotshwa zibeseduze lezihlobo zazo."

Ababale ngezomthetho abafana legqwetha, uMnu. Martin Dingake bathi kuyayeneliseka ukuthi izibotshwa zisuswe kwelinye ilizwe ziyepika kwelinye, kodwa kumele ilizwe abayakulo, lenelise ukwamukela lezizibotshwa.

"Bangenza izivumelwano, kuyeneliseka, kodwa kulakho ukuthatha isikhathi eside. Kumele ilizwe lapho okuya khona izibotshwa libe lendawo eyeneleyo emajele ukwamukela lezizibotshwa."

Ngaphansi kwesivumelwano esizangena, izibotshwa kumele zibe ziphuma elizweni elilesivumelwano leBotswana ukuthi bathuthukiswe babuyele bayeqedisa ukupika kibo.

Kulabe Zimbabwe abedlula amakhulu ayisikhombisa abasemajele eBotswana.

Facebook Forum

XS
SM
MD
LG