amalinks wokungena

Breaking News

Bathwele Nzima Abadabuka eZimbabwe Abadinga Imisebenzi Emigwaqweni eBotswana


Abadabuka eZimbabwe abasebenza eFrancistown, Gaborone lezinye indawo kwele Botswana bathi bathwele amagabha avuzayo.

AbeZimbabwe abaphila ngemisetshanzanyana kwele Botswana bathi impilo kayilula ngesikhathi seCOVID-19 noma nje ilizwe leli selaphuma kuhlelo lokuthi abantu behlale ezindlini bengahambahambi, olwelockdown, kusenzelwa ukunqabela ukumemetheka kwalomkhuhlane.

UNkosikazi Emily Dube, omunye wabaphila ngokuhambahamba emigwaqweni eGaborone edinga umsebenzi, uthi kunzima ukuthola umsebenzi kulez’insuku.

Lokhu kwaqhamuka umkhuhlane weCOVID-19, wona osumemetheke umhlaba wonke jikelele, impilo ayisafani kuDube labanengi abakusimo sakhe.

Noma nje iGaborone seyaphuma kuhlelo lwelockdown, abantu sebevunyelwa ukuya emsebenzini, amapholisa aqhubeka echithiza abahamba hamba bedinga imsebenzi.

UDube uthi banengi abantu abakusimo esifana lesakhe.

“Babethola sibili abantu besiyabasebenzela babanike lokhu ababanika khona kodwa ngenxa yeCOVID sekulobunzima njalo labo bayesaba ukuthathwa ngamapholisa bemile bedinga imisebenzi.”

UMnu. John Shumba laye uthi emigwaqweni akuselula lutho ngoba imisebenzi kayisatholakali. Uthi lomthetho lawo kawubavumeli ukuthi babe besima ezitaladeni bedinga umsebenzi.

“Umsebenzi kawutholakali, lawo ama piece jobs kawasatholakali. Lomthetho kawuvumi ukuthi sisebenze lapha.”

Umphathintambo obona ngezokungena lokuphuma kwabantu kwele Botswana, uNkosikazi Annah Mokgethi, uthi ilizwe lakhe lokhe libhekane lobunzima babantu abangena okungekho emthethweni.

“Ugatsha lwami lwabhekana lodubo lwabangena okungekho emthethweni, kwezinye izikhathi bengena endaweni okungamelanga bengene khona. Kuqakathekile ukuthi siqinise ukulinda imingcele yethu.”

Noma kuyisikhathi sokuthi imingcele ivaliwe, abanye abeZimbabwe baqhubeka bezama ukungena kwele Botswana, bexotshwa yisimo esilukhuni ekhaya.

Ngenyanga edluleyo amapholisa eBotswana adubule abulala oweZimbabwe okade eyeqe umngcele okungekho emthethweni, isenzo esigconwe kakhulu linengi.

Facebook Forum

XS
SM
MD
LG