amalinks wokungena

Amapholisa Abopha Izizalwane zeZimbabwe Ezingena eBotswana Zingelamvumo

  • Martin Ngwenya

Zithwele nzima izizalwane zeZimbabwe ezingela maphepha okuhlala kwele Botswana.

Amapholisa eBotswana aphakathi komkhankaso wokubopha njalo ephindisela ekhaya abeZimbabwe abangene elizweni lelo okungekho emthethweni.

Amapholisa athi abantu bakhonona ngokuthi abangena elizweni okungekho emthethweni yibo abadala amacala amanengi.

Lokhu kwenzakala ngesikhathi sokudlala umacatshelana phakathi kwamapholisa lezizalwane ze-Zimbabwe ezingena eBotswana okungekho emthethweni.

Amapholisa abike ekuqaleni kweviki ukuthi asesungule umkhankaso wokukhipha wonke umuntu ongene elizweni okungekho emthethweni.

Isikhulumi samapholisa, uMnu. Witness Bosija, uthi uzulu weBotswana uyakhonona ngokuthi amacala aseqongile ikakhulu esigodlweni eGaborone njalo adalwa ngabangena elizweni okungekho emthethweni.

Kulenkulungwane lenkulungwane zabantu beZimbabwe abangena eBotswana okungekho emthethweni, inengi lizodinga ukuziphilisa, kukanti abanye badala amacala.

Kodwa akusabethusi abeZimbabwe ukugijinyiswa ngamapholisa ngenxa yokuthi sekuyihlalayenza.

Isizalwane seZimbabwe esihlala eBotswana, uMnu. Melusi Ndlovu, uthi, “Sokuyimpilo yakhona ukutshona sixotshwa ngamapholisa kodwa ngabe ekhaya kulungile ngabe asikuboni konke lokhu.”

Esinye njalo, uMnu. Alfred Lunga, laye ukhala ngokuthi isimo ekhaya yiso esenze abantu beZimbabwe baphenduka inhlekisa ezizweni.

“Akukho ukuphumula nxa unguwe Zimbabwe. Sesihlala sigijima, okungcono yikuthi sizameni ukuzilungisela elethu ilizwe ngoba kumgceke ukuthi omakhelwane abasasifuni, labo bakhathele ngathi.”

Ababanjiwe basiwa esitokisini kuqala besalindele imota, ezaziwa kakhulu ngokuthi ngamagumba gumba, ukuthi zibathwale ziyebalahla emngceleni wePlumtree.

Kodwa iBotswana ithi inengi liyaphindela noma nje uhulumene ekhala ngokusebenzisa izigidi zamapula ukubuyisela abeZimbabwe emuva.

Abanye bakhala ngokukhahlanyezwa ezandleni zamapholisa, kodwa noma kunjalo, babhensela ukuphenduka kulokubuyiselwa ekhaya.

Facebook Forum

XS
SM
MD
LG