amalinks wokungena

Breaking News

EleBotswana Lilungiselela Ukuvala Ngci Indawo Ezinengi Lisenzela Ukuvimba Ukumemetheka kweCoronavirus


UMongameli wakwele Botswana, uMnu. Mokgweetsi Masisi. (Romsn Pilipey/Pool Photo via AP)
UMongameli wakwele Botswana, uMnu. Mokgweetsi Masisi. (Romsn Pilipey/Pool Photo via AP)

EleBotswana selibike ukuthi lalo lizalandela inyathela elithethwe yiSouth Africa elokuthi abantu bahlale ezindlini okwamaviki athize kusenzelwa ukunqabela ukumemetheka kwengciwane lecoronavirus.

Inyathela leBotswana elizayo lokuthi abantu behlale ezindlini okwamalanga amanengi, livala omunye umthombo kuzizalwane zeZimbabwe ekade zithenga impahla kumbe zithola imali evela kuzihlobo ezikulelozwe.

EleSouth Africa, elinye ilizwe abeZimbabwe abathembele kakhulu kilo, selazise ukubana lizaqhuba uhlelo lokuvalela abantu ezindlini okwamaviki amathathu, oluqala ngoLwesihlanu ekuseni.

UMongameli Mokgweetsi Masisi wakwele Botswana, kumbiko awukhiphe kukhasi lakhe lweTwitter, uxwayise uzulu ukuthi azilungiselele ukuhlala ezindlini okwesikhatshana.

Leli linyathela lokulwisana lomkhuhlane osumemetheke okwamagama umhlaba wonke jikelele, owecoronavirus, kodwa kungela oseke wabanjwa elawo kwele Botswana.

Omunye oweZimbabwe ohlala eGaborone, uMnu. Mthabisi Dube, uthi kuzabanzima ukuthi baphathise imuli ekhaya ngesikhathi bevalelwe ezindlini.

“Lesi yisikhathi esinzima. Kutsho kuzabalukhuni kakhulu kuzihlobo zethu ekhaya ngoba inengi lithembele kithi ukuthi sithumele imali kanye lokudla. Kodwa khathesi akulamabhasi ahambayo, njalo indawo ezinengi ziyabe zivaliwe. Into yonke imile."

EleBotswana beselivele labika ukuvala imngcele yalo kuyonale iviki, kulandela ukuqonga kwenani labantu abale coronavirus eSouth Africa, kanye lokubhubha koyedwa eZimbabwe.

Ukuvalwa kwendawo ezinengi eBotswana, kungabona abanye belahlekelwa yimsebenzi, ngesikhathi isimo somnotho sihluzuka ngamandla ngenxa yokumemetheka kwecoronavirus.

UMnu. Albert Nkomo, osebenza eGaborone, uthi balakho ukuzithola bengaselamsebenzi ngenxa yokuthi amakampani amanengi ayabe engenzi mali ngesikhathi kuvaliwe.

"Sitsheliwe emsebenzini ukuthi kungenzakala ukuthi abanye belahlekelwe yimsebenzi ngenxa yokuqhamuka kwesifo secoronavirus. Yizikhathi ezinzima, njalo lathi silungisela ukuyahlala ezindlini zingenzi lutho njengoba umongameli Masisi esitsho. Akula okungenziwa."

Kulenengi labeZimbabwe elisebenza engatsheni ezitshiyeneyo kweleBotswana kodwa, umnotho wakuleli lizwe usuqala ukuzwa isisindo esifakwa yikumemetheka komkhuhlane wecoronavirus umhlaba wonke.

Umnotho weBotswana ugxile kakhulu ekumbeni lokuthengisa amatshe aligugu,amadayimani, kodwa, ngenxa yokuthi umkambo wamatshe la usemazweni angaphetsheya kolwandle, kunzima ukuthi abantu bethenge.

UNkosikazi Emily Moyo, laye ohlala eGaborone uthi lesi yisikhathi esiletha ukudangala, ngoba bengazi ukuthi umkhuhlane wecoronavirus uzaphela nini.

“Bangaze bathi sihlale ezindlini singaphumi, okunzima yikuthi asikwazi ukuthi lokhu kuyaphetha ngani, njalo nini."

Impilo izaqhubeka isiba nzima kunengi eBotswana, ngemva kokuba inkokheli ibike ukuthi indawo ezinengi zizavalwa.

Kusenjalo, abeZimbabwe akade bevakatshele kweleBotswana, bavunyelwe ukuthi baphume noma nje imngcele ivulelwe ukuhamba kwemphahla kuphela.

XS
SM
MD
LG