amalinks wokungena

Idale Lephalamende Lihlutshwa Yikukhahlanyezwa Kwabantu beZimbabwe eBotswana

  • Martin Ngwenya

Zithwele nzima izizalwane zeZimbabwe ezingela maphepha okuhlala kwele Botswana.

Ikhomithi ye dale lephalamende ebona ngendaba ezanzakala phandle kwelizwe, iParliamentary Portfolio Committee on Foreign Affairs, isikhonone ngochuku izizalwane zeZimbabwe eziphathwa ngalo kwele South Africa kanye leBotswana.

Kodwa, abanye beZimbabwe eBotswana bathi ngaphandle kokuthi umumo womnotho ulungiswe ekhaya, isimo sokudubeka bengaphandle kwelizwe sizaqhubeka.

Umngcinisihlalo wekhomithi yedale lephalamende ebona ngobudlelwano beZimbabwe lamanye amazwe womhlaba, uMnu. Kindness Paradza, ubikwa etshele iphalamende yeZimbabwe ukuthi abeBotswana labeSouth Africa bahlukuluza izizalwane zelizwe lakhe.

UParadza uthi bazahlangana leziphathamandla emazweni womabili ukukhonona ngemphatho ephiwa ikakhulu labo abeqa umngcele okungekho emthethweni.

Inengi, elifika inkulungwane lenkulungwane labeZimbabwe, lingena eBotswana kanye leSouth Africa, libalekela ubunzima besimo somnotho ekhaya.

Ngokunjalo abanye eBotswana abafana loMthabisi Dube bathi uhulumende weZimbabwe kafake imizamo ekulungiseni umnotho welizwe, okuyiso isiqokoqela esixotsha abantu elizweni.

“Uhulumende angaze akhulumisane leBotswana kanye leSouth Africa akusoke kuntshintshe lutho uma isimo somnotho singalungiswanga.”

Kukanti uNkosikazi Abbie Nare uthi ekhaya baxotshwa yisimo esilukhuni somnotho, okwenza babone kungcono ukubhensela ukuhlukuluzwa eBotswana.

Uthi kuliqiniso ukuthi abantu baphathwa ngocuku kodwa iZimbabwe kumele ilungise indlu yayo.

“Abantu bayahlukuluzwa, kodwa asikhangeleni isiqokoqela sendaba; okungumnotho weZimbabwe. Amanye amazwe layo asediniwe ngodaba lweZimbabwe.”

Omunye weBotswana umnunzana Tshepo Bosaletswe uthi abangena elizweni okungekho emthethweni bayahlukuluzwa ngoba bebonakala njengabantu abazodala amacala.

“Lolu kuzahlala kuludaba oluhluphayo phakathi kwamazwe womabili, ngoba iBotswana ibona angathi abangena elizweni okungekho emthethweni bazodala amacala.”

Abangena elizweni okungekho emthethweni bathelwa imvubu bengakabuyiselwa eZimbabwe, kodwa sekube lokukhonona ukuthi abanye baphuma belimele kakhulu. Kulomunye osanda kulahlekelwa lilihlo ngemva kokudutshulwa ngamapholisa kukanti omunye kasenelisi ukuhamba esesebenzisa isihlalo esilamavili, iwheel chair ngemva kokuthelwa imvubu.

Amazwe womabili ahlala njalo nje edinga indlela angahluza ngalo udaba lwabangena eBotswana okungekho emthethweni, umhlangano wokucina owe Joint Permanent Commission On Defence and Security ubanjwe eGaborone evikini esanda kudlula kodwa kungatholakanga impendulo.

Facebook Forum

XS
SM
MD
LG