Umphathintambo wezemali, uMnu. Mthuli Ncube, ngoLwesine wethule uluhlu lokubuthaniswa lokusetshenziswa kwemali kahulumende, iBudget ka2020.
UNcube wazise ukuba ugatsha lwezemfundo luqakathekile kakhulu ekuvuseleleni isimo somnotho elizweni ngakho-ke ubecabanga ukulupha amabillion edlula $8.4 billion.
“Kwezemfundo sizabona ukuthi wonke umntwana uyafunda ngoba uhulumende ufuna wonke umuntu afunde. Ngizalupha imali efika $8.5 billion kugatsha lwezemfundo yaphansi, ngiphe i$2.2 billion kugatsha lwemfundo yaphezulu.”
Ngesikhathi odokotela labongi bekhalala umsebenzi bekhonona ngokusilelela kwemitshina yokusebenzisa leholo eliphansi, uNcube wabele ugatsha lwezempilakahle amabillion ayisithupha lengxenye amadola - $6.5 bhillion okumangalise abanengi.
Uqhubeke esithi umthelo wokubili ekhulwini - 2% uzaqhubeka ngoba uqakathekile ekuvuseleleni umnotho welizwe lokubuthanisa imali ephiwa abantu abadala eyepentsheni.
Osakhulayo uTakawira Kovedzai uthi kuyajabulisa ukuthi ilizwe lisekela imfundo ngoba elakusasa lelizwe lisebantwaneni abafundayo.
Omunye njalo osakhulayo, uMunashe Mtutsa uthe uthokoziswe yikuphiwa imali kwabatsha abalamabhizimusi asaqalayo.
UNcube uveze ukuba ukulungisiswa kwesilindweni sendizamtshina eseRobert Mugabe international Airport eHarare, lemitshina yokugaya ugetsi kusetshenziswa amalahle eHwange ngeminye yemisebenzi eyezenziwe nguhulumende kaMongameli Emmerson Mnangagwa ephumelele okwamagama.
Ugatsha lwendaba zasekhaya oluyilo olulohlangothi lwamapholisa lwabelwe amabillion phose amathathu amadola - $2.8 billion, elozomvikela olulebutho, amabillion athoba minwe mibili lengxenye - $8.5 billion.
