amalinks wokungena

Breaking News

Uzulu Uhlolwa Umkhuhlane Wemvukuzane Yebele eZimbabwe


Uhlelo lohlola imvukuzane yebele lwenzelwa ukwenqabela umkhuhlane lo.
Uhlelo lohlola imvukuzane yebele lwenzelwa ukwenqabela umkhuhlane lo.

Abenhlanganiso ephathisa uzulu ngolwazi oluphathelane lemihlobo yemvukuzane eye Cancer Association, bathi kube lenguquko kundlela uhlelo lokuhlola imvukuzane yebele, lwemukelwe ngayo lonyaka, okuyisibonelo sokuba uzulu usekwazi ukuqakatheka kokuhlolwa isikhathi sisesekhona.

Loluhlelo luqhutshwa minyaka yonke emhlabeni jikelele ngenyanga kaMfumfu, lapho okuqakathekiswa khona ukulwisana lemvukuzane yebele emuntwini wonke okubalisa abesifazane labesilisa.

Abenhlanganiso ye Cancer Association, baveze ukuba indlela uzulu aze ngayo ukuzahlolwa ukuba ulayo na imvukuzane yebele, ibi yehlukile kuminyaka edlule njalo kubajabulisile lokho.

Okubajabulisileyo bathi yikuba labobaba beze labo ukuzahlolwa njengoba belakho ukuhlaselwa yilemvukuzane, lanxa isilinganiso sabo siphansi nxa kuqathaniswa labesifazane.

Selokhu beluqalileyo loluhlelo, bebesiza nsuku zonke abantu ukuzahlolwa, besebenza nsuku zonke ngoMvulo kuze kuyefika oLwesihlanu, kusukela ekuseni kuze kuyetshaya ihola letshumi lambili emini.

Ophethe uhlangothi lwezokukhulumisana lozulu, uMnumzana Lovemore Makurirofa, uthi lonyaka omunye umehluko abawunanzeleleyo yikuthi abesifazane asesebatsha abaphansi kweminyaka engamatshumi amabili, labo bebekhuthalele ukuzahlolwa isimo sabo kwezemvukuzane yebele.

UNkosikazi Nokuthula Siziba, ngomunye walabo abaze ukuzohlolwa emahofisini eCancer Association eHarare.

Ukubone kuqakathekile ukuba azi isimo sakhe unkosikazi Siziba kungakho ethethe lelinyathelo lokuyahlolwa lonyaka.

Lanxa bekuzwisisa ukuba ilakho ukuhlasela abesilisa njalo le imvukuzane, basesekhona obaba abalokhe bengakwemukeli lokho.

Umnumzana James Jama ngomunye walabo baba, abalokhe bengakuzwisisi lokho.

Abe Cancer Association bathi bayafisa ukuba ngabe lolu hlelo lufinyelele wonke umuntu lusabalale kizo zonke indawo zelizwe, kodwa udubo lwemali kuyiwo umgoqo omkhulu.

Lonyaka luqhutshwa phansi kwendingimba ethi "Think Pink, Breast Cancer Awareness Campaign", loluhlelo oluqhutshwa kuyonale inyanga kaMfumfu ngenhloso yokuphathisa ukusabalalisa ulwazi kuzulu lokuqakatheka kokuthi azi isimo sakhe phezu kwemvukuzane yebele, ehlasela kakhulukazi abesifazane lanxa bekhona abesilisa labo abahlaselwa yiwo.

Udaba lohlelo lokuhlolwa imvukuzane yebele
please wait

No media source currently available

0:00 0:04:04 0:00
Lapho esitholakala khona

XS
SM
MD
LG