amalinks wokungena

Alakho Ukuqolotsha Amaqembu Enguqu Awe Zimbabwe Kumncinstiswano yeAfrica

  • Joseph Njanji

Iqembu leCaps United lidlala kumncintiswano weAfrica Cup of Nations

Akhanya aselethuba elihle elokudlulela esigabeni esilandelayo, amaqembu omdlalo wenguqu amela ele Zimbabwe emidlalweni eyokudinga intshantshu zezwekazi lase Africa ngemva kwemidlalo edlalwe ngempelaviki edluleyo.

Iqembu le Caps United libe ngutshiki lobhanqa kungela elenelise ukulitshayela emambuleni leqembu le Lioli elase Lesotho emdlalweni odlalelwe khonale eLesotho ngoMgqibelo.

Abafana beMakepekepe bamele ilizwe kumncintiswano we African Champions League kuthi iqembu le Ngezi Platinum lona limele ilizwe kumncintiswano we Caf Confederations Cup.

Iqembu le Ngezi Platinum libe ngutshiki lobhanqa 1 ka 1 leqembu le Pamplemousse elase Mauritius khonale kwele Mauritius ngeSonto njalo intathelizindaba yezemidlalo uNation Ndlovu uthi zombili iCaps le Ngezi zidlale kuhle kakhulu loba nje zibe ngutshiki lobhanqa.

“Amaqembu lawa amabili ayiwo asimele kumidlalo yeAfrica aqhube kuhle kakhulu ngoba ungakhangela iqembu le Ngezi Platinum lenelise ukuhlohla lidlala lingekho ngekhaya okuyinto engalisebenzela nxa selidlala lingekhaya.

“Lalo iqembu leCaps United loba lingahlohlanga khonale eLesotho kodwa lizasebenzisa ithuba lokudlala lingekhaya kuhlandla lesibili elomdlalo.”

Iqembu le Caps United lele Lioli abedibene kuhlandla lakuqala ele Caf Champions League preliminary round njalo ihlandla lesibili lizadlalwa ngempelaviki elandelayo esigodlweni iHarare.

Nxa lingaphumelela ukufinyelela kusigaba esilandelayo esomncintiswano iqembu le Caps United lizabe lizangqikilana lele TP Mazembe elase Democratic Republic of Congo.

Ngakwelinye icele iqembu le Ngezi Platinum Stars lele Pamplemousse wona abedibene kuhlandla lakuqala ele Caf Confederations Cup preliminary round njalo ihlandla lesibili lizadlalwa ngempelaviki ezayo eMhondoro.

Nxa lingenelisa ukudlulela phambili iqembu le Ngezi Platinum lizabe lizahlangana lele C.D Libolo elase Angola kusigaba esilandelayo esomncintiswano.

Facebook Forum

XS
SM
MD
LG