amalinks wokungena

Yiliphi Iqembu Elizathatha Isicoco Lonyaka seCastle Lager Premier Soccer League?

  • Joseph Njanji

Tsholotsho FC vs Dynamos.

Akukacaci ukuba kuyozalwa nkomoni phezu kwengalane yemiklomelo ekupheleni kwesizini kusigaba se Castle Lager Premier Soccer League ngemva kwemidlalo yamaviki amabili lathoba minwe mbili.

Sekusele imidlalo eyisithupha ukuba imidlalo yenguqu yesigaba se Castle Lager Premier Soccer League ifike komlindi uyacina njalo usuvutha amalangabi umncintiswano wokuphakamisa isicoco salonyaka.

Iqembu le Dynamos lona elibe ngutshiki lobhanqa 1 ka 1 lele ZPC Kariba ngoMgqibelo yilo elihlezi phezu kwengalane lilemiklomelo engamatshumi amahlanu lesikhombisa kuthi ngemva kwalo kulezimbamgodi abafana be Ngezi Platinum kanye labe FC Platinum bona abalemiklomelo engamatshumi amahlanu lesithupha iqembu ngalinye.

Iqembu le Ngezi Platinum linqobe ele Bulawayo City nge 1 ka nya ngoMgqibelo kuthi ele FC Platinum litshaye ele Highlanders nge 2 ka 1 ngeSonto.

Iqembu elinye elilethuba elokuphakamisa isicoco ngele Chicken Inn lona elisendaweni yesine njalo elilemiklomelo engamatshumi amahlanu lambili ngemva kokuba ngutshiki lobhanqa 1 ka 1 lele Shabanie Mine ngoLwesihlanu.

Emsileni wengalane iqembu le Bantu Rovers libe ngelakuqala ukugunyulwa kusigaba saphezulu lonyaka ngemva kokubhaxabulwa nge Harare City nge 5 ka nya ngoMgqibelo.

Iqembu le Bantu yilo elijeke amanye wonke engalaneni lilemiklomelo elitshumi lantathu kuthi phezu kwalo kuleqembu le Tsholotsho lona elilemiklomelo engamatshumi amabili njalo elinqotshwe nge 2 ka nya ngele Chapungu ngoMgqibelo.

Endaweni yesithathu kuleqembu le Hwange lona elilemiklomelo engamatshumi amabili lathoba munwe munye njalo elinqobe ele How Mine nge 1 ka nya ngoMgqibelo.

Facebook Forum

XS
SM
MD
LG