amalinks wokungena

Breaking News

Amapholisa Athwalise Nzima Abantu Abalejwabu Elimnyama eBotswana


Bathwele nzima abantu abalejwabu elilombala omnyama kwele Bostwana lapho ababuzwa khona amaphepha okuhlala kulelolizwe loba abanye babo beyizizalwane zelizwe leli.

Abalombala omhlophe baziphilela kahle ngoba inengi labantu beBotswana lilombala onjalo.

Umcabango okhona ovamileyo kwele Botswana yikuthi abokuza, babonakala ngejwabu labo elilombala omnyama tshu. Abanye abanjengalabo abadabuka emazweni anjenge Sudan bamnyama lokhuya okokuthi babonakala ubuso ngamazinyo lapho bebobotheka njalo bekhuluma ngolimi lweSingisi kodwa olweyamele kulimi lwalapho abadabuka khona olwehlukene labeBotswana.
Lokhu, ngezikhathi ezinengi, kusetshenziswa ngamapholisa ukudinga labo abangena elizweni okungekho emthethweni.

Inengi labase Botswana elilejwabu elimnyama kakhulu, likhala ngokuthi liyamiswa endleleni ngamapholisa, ikakhulu ngesikhathi semikhankaso evamileyo eye stop-and-search, bebuzwa izithupha.

UMnu. Mompati Tlhakane uthi uyake azibonele ngokwakhe ngoba amapholisa evame ukumisa abalejwabu elilombala omnyama, becabanga ukuthi bangabokuza.

"Silabo abantu abalombala omnyama eBotswana … Babhekana lokuhlukuluzwa ngamapholisa okungaqondanga. Kulabavela phandle abalombala omhlophe, bona bayenelisa ukuhlala ngoba kungela ongacabanga ukuthi ngabokuza abangene elizweni okungekho emthethweni."

Isizalwane zeZimbabwe, uNkosikazi Emily Ndlovu, uthi abalejwabu elilombala omnyama bahle bafakwe isidindo sokuthi ngabantu bokuza, ngakho isiphatho sakho, kuqala emngceleni, siyabe sehlukile.

"Nxa bekhangela bebona ukuthi kawumhlophe, bathi uvela eZimbabwe, sebefaka uphawu, njalo ngendlela abakuphathangayo ayiyinhle. Kodwa ma umhlophe bakuphatha engathi ungomunye wabo."

Omunye olejwabu elingani liyakhanya, uNkosazana Sithembile Sibanda, uthi emngceleni uphathwa kuhle, kukhangelwe ukuthi mhlawumbe laye ngoweBotswana, ngenxa yombala wejwabu lakhe.

"Ngenxa yokuthi ulombala omhlophe, bakuphatha kahle becabanga ukuthi ongumunye wabo."

Amapholisa aqala uma usuka emngceleni, ikakhulu oweRamokgwebana ongcelelane lePlumtree, ukudinga ezimoteni labo abangabe bengene elizweni okungekho emthethweni.

Omunye osakhulayo ohlala eGaborone, uMnu. Denilson Dube, uthi kayisiyo Botswana kuphela ephatha abantu ikhangele umbala wejwabu, ethi kuyenzakala lakwamanye amazwe afana laseSouth Africa.

“… ESouth Africa labo babona abalombala onsundu engathi ngabo kuza njalo bayamiswa ngamapholisa bebuzwa imbuzo. Ludaba olubunjwe kumbono yabantu ngakho kuzathatha isikhathi ukuwuntshintsha."

Ilizwe leBotswana lona alikayekethisi umkankaso wokudinga abangena elizweni okungekho emthethweni.
Uma kulokunye, seliqinise ukubuyisela emuva, ikakhulu abeZimbabwe abaselizweni okungekho emthethweni.

AbeZimbabwe, bebhekane lalobubunzima, sebadinga amaqinga afana lokwazisana ngendlela zokuxoxisana ezifana leWhatsApp ukuthi bazisane ukuthi amapholisa afake imigoqo yama roadblocks kuphi, ukuze bengahambeli khona.

Udaba Esilethulele NguMartin Ngwenya
please wait

No media source currently available

0:00 0:03:10 0:00

Facebook Forum

XS
SM
MD
LG