amalinks wokungena

Breaking News

Abantu Bahlaba Umkhosi Ngokwenzakala Kubandla leMDC-T


UNkosazana Thokozane Khupe uxoxa labantu emgwaqweni.

Annastacia Ndlovu

Ibandla leMDC-T liphakathi kwelitshe lembokodo ngokulandelwa kwesisekelo sombuso waso ngemva kokubhubha kukamuyi uMnu. Morgan Tsvangirai.

Lobakunjalo, isisekelo sombuso salelo bandla sithi umsekeli wakhe, uNkosazana Thokozani Khuphe, nguye omele akhokhele aze abize umhlangano oqakathekileyo owe Extra Ordinary Congress.

Isimo simanzonzo kuMDC-T kuyaliwa kuluthuli, inkokheli eyakhethwa ngumuyi ingasalandeli lelicele lesisisekelo sombuso. Ilandela elinye icele elavela lanikeza uTsvangirai amandla okuzikhethela abasekeli osokudale ukubangisana loMaKhuphe.

Osezithi nguye olelungelo lokukhokela iMDC-T yena wadliwa kukhetho lweCongress, uMnu Nelson Chamisa, wethule isinqumo esilakho ukuxotsha uMaKhuphe ebandleni.

UChamisa labanye bakhe babe lemihlangano eDete lePlumtree ezabelweni zeMatabeleland ngempelaviki engangenwanga nguMaKhupe.

UZulu weZimbabwe ulemibono eyehlukeneyo ngokwenzakala kuMDC-T abanye besekela uMaKhuphe abanye njalo besekela uChamisa. Kodwa-ke umuntu wonke uvumelana ukuthi udlakela olusebandleni leli kumele luphele.

UNkosazana Charity Lifa, isakhamuzi sakoBulawayo, uthi akulunganga ukuthi abantu bagongodane kubandla leMDC-T.

Osakhulayo uThango Gwinji uvumelane loCharity esithi kulusizi ukuthi abanye abalandeli bebandla leMDC-T bephula isisekelo sombuso ukwenzela ukuthola izikhundla eziphezulu.

Abasekela uMaKhuphe bathi kuyayangisa njalo ngendlela isimo esingakhona kunzima ukuthi bengathini.

UMnu. Limukani Baloyi uthi kubazwisa ubuhlungu okwenzakalayo ngoba bebekhangelele ukuthi uMaKhuphe nguye olelungelo lokuthatha isikhundla sikaTsvangirai kodwa kwavele kwawonakala lapho kufakwa abanye abasekeli ababili.

Abasekela uChamisa bathi ulamandla okususa uMongameli Emmerson Mnangagwa esikhundleni.

Bathi uChamisa wasebenzisa amandla aphiwa uTsvangirai kuCongress yokucina ukuthi akhethe umuntu amfunayo okumele athathe isikundla esiphezulu sebandla leli.

Bathi uMaKhupe kumele aphole abesesebenza loChamisa.

Ukuxabana lokuxokozela osekuthumbe ibandla leMDC-T sekutshiye inengi labantu lidideke ingqondo ngoba bebekhangelele ukuba uMaKhuphe uzabangomkhokheli kubandla leli njalo kuyiwe ekhethweni bemanyene ukuze bakhuphe ibandla leZanu PF embusweni.

Facebook Forum

XS
SM
MD
LG