Umanyano wamazwe awezwekazi leEurope oweEuropean Union (EU) usuphinde wengeza usekelo ngokusebenzisa indizamtshina ezancedisa ekuthwaleni ukudla lokunye okumelelwe ngabantu ababhekane lohlupho oludalwe lizulu lesiphepho uCyclone Idai.
Umanyano lo owethule umbiko lo uthi indizamtshina le eqale ukusebenza ngoLwesibili izathwala ukudla, impahla, imithi lokunye kwabantu abahlala eChimanimani leChipinge esabelweni seManicaland.
Ummeli weEU eZimbabwe, uMnu. Timo Olkkonen, uthe lindizamtshina izancedisa njalo ekuhlolisiseni lingozi endaweni ezitshiyeneyo.
UNkosazana Princess Nkomo, omunye wabaphathisa ekubuthaniseni uncedo olufunwa ngabehlelwe yingozi le, wamukele ngenjabulo inyathelo elithethwe ngabe EU.
"Ngiyajabula kakhulu ngemizamo yabantu lenhlanganiso ezinengi ukuthi balwisane lomonakalo owenziwe lizulu lika Idai. Usekelo lweEU ikakhulu luyancomeka ngoba kulokhu kusaselabantu abangatholakaliyo okutsho ukuthi indizamtshina leyi izanceda ekudingweni kwabo nje lokuhambisa ukudla, amanzi, imithi lezinye nje into ezithile".
Umphathintambo wezamafekitali lamabhizimus, uMnu. Simangaliso Ndlovu, laye uveze intokozo ngosekelo oluvele kwabe EU.
“Silusizi ngokwenzakaleyo eManicaland. Sisasesibangeni sokukhangela ukuthi silahlekelwe kangakanani ezifuyweni, imphefumulo yabantu kanye lendawo zokusebenzela. Sike saxoxa labosomabizimusi abakhanye betshengisela ukubambana …”
Loba nje uhulumende eveze ukukhathazeka ngomonakalo odalwe yingozi yeCyclone Idai, sekuphuma imibiko edanisayo ivela ezigabeni ezibhekane lomonakalo ethi abasekeli bebandla leZanu PF bathethe okunye ukudla bekupha izigaba zabo.
Abephephandaba leNewsday bathi amalunga edale lephalamende aweZanu PF yibo abakhokhela ekuboneni ukuba izigaba zabo zithola ukudla kuqala.
UNkosazana Nkomo usole kakhulu izenzo zabanye abeZanu PF ezokweba lokuhuquluza uncedo okumele luqondiswe ababhekane lobunzima.
“Kuyadanisa kakhulu ukuzwa ukuthi lapho sibhekane lesikhathi esinzima abanye abantu abangabakhokheli sebesebenzisa usizo lolu ukulwa impi zabo zombusazwe. Kabame abakwenzayo, kakulunganga njalo kakulabuntu phakathi, kulihlazo elingenza abanye abafisa ukunceda ukthi bangaze basanceda.”
Kodwa uMnu. Simangaliso Ndlovu ulandule lokhu esithi kulabanye abantu abadinganje ukwehlukanisa abantu esikhathini esinzima kangaka.
Inani labantu asebefile kule ingozi ebangelwe lizulu lesiphepho ele Cyclone Idai, elihlasele indawo zesabelweni zeManicaland, ezigoqela iChimanimani, Chipinge lezinye selisedlula amakhulu amabili njalo abanye abedlula amakhulu amathathu lokhu bengabonakali.
