amalinks wokungena

Breaking News

Umthethwandaba Ulungiselela Ukwethula Isinqumo Sodaba Lwabodokotela Abakhalala Umsebenzi


Bahlaba umkhosi odokotela eZimbabwe

Umthethwandaba weLabour Court ubuthonisa udaba lwabodokotela abakhalala umsebenzi ngoLwesine eHarare.

Umthethwandaba uthe uzakwethula isinqumo sodaba lolu ngokuya kwesikhathi.

Uhulumende wethule izizatho zokuhambisa udaba lolu emthethwandaba kulandela isinqumo somthethwandaba lo esokuthi kwakungaphumi sobala ukuthi uhulumende ufuna kwenziweni ngodokotela abakhalala umsebenzi.

UDokotela Masimba Ndoro, isikhulumeli senhlanganiso yabodokotela eyeZimbabwe Hospital Doctors’ Association, uthi igqwetha labo, uMnu. Doug Coltart, utshele umthethwandaba ukuthi lokhu zingacaci izizatho zokuthi uhulumende wahambiselani udaba lolu eLabour Court.

UColtart uthe odokotela abakhalalanga umsebenzi kodwa behluleka ukuya emsebenzini ngenxa yokuthi bahola imali ephansi okokuthi kabasenelisi ukuhlawula imali yokugada imota ezithwala uzulu kumbe ukuthela amafutha emoteni okumele bazisebenzise.

Kodwa-ke abamele uhulumende bathe odokotela kumele babuyele emsebenzini ngoba abakwenzayo akukho emthethweni.

Bathe uhulumende ulakho ukukhangela izikhalazo zabo besemsebenzini hatshi bezihlalele ezindlini zabo.

Odokotela abasathuthukayo lalabo asebehlale isikhathi eside besebenza ezibhedlela zikahulumende bakhalala umsebenzi bekhonona ngeholo eliphansi.

Uhulumende uthi uzame ukukhuphula iholo labo ngokuyisilinganiso sokungamatshumi ayisithupha ekhulwini – 60 percent – ngeviki ephelileyo kodwa bala ukwamukela lokhu.

Facebook Forum

XS
SM
MD
LG