amalinks wokungena

Breaking News

Obert Mpofu: Amapholisa Azabopha Abantu Abazakwenza Udlakela Ngesikhathi Sokhetho


UMnu. Obert Mpofu
UMnu. Obert Mpofu

Umphathintambo wendaba zasekhaya, uMnu. Obert Mpofu, uthi amapholisa azabopha abantu abazakwenza udlakela ngesikhathi ilizwe lilungiselela ukhetho oluzayo.

UMpofu, obesekwethekeleni enkambeni yeziphepheli eyeDukwi eBotswana, uthi akulasizatho sokuthi abantu betshwaywe luvalo ngokuthi mhlawumbe kungaba lodlakela ngesikhathi so khetho.

UMpofu uthi amapholisa azabopha noma ngubani ozazama ukuvusa udlakela, kungakhathalekile ukuthi ngowaliphi ibandla lesombusazwe.

Ngesikhathi sokhetho, abamabandla aphikisayo bavame ukukhonona ngokuthi abasekela ibandla elibusayo leZANU PF, kababotshwa bengaze bedale udlakela. Bathi kubotshwa kuphela abasekela amabandla aphikisayo laloba kuyibo abayabe betshayiwe ngabebandla elibusayo.

Inengi libheke ngabomvu amehlo, ukuthi kuyozalwa nkomoni kukhetho lwalonyaka phansi kombuso omutsha kamongameli Emmerson Mnangagwa.

Ngomnyaka ka2008, ngesikhathi kukhankaselwa ukhetho lokudinga umongameli, kwaqhamuka udlakela olubi okumangalisayo olwatshiya abanye befile kukanti abanye babalekela emazweni angomakhelwane agoqela ele Botswana bezodinga ubuphepheli lemazweni aphetsheya kolwandle.

Kodwa uMpofu uthembise ukuthi lonyaka kuzabe kuzaba lomehluko ngoba bakhangelele ukuqhuba ukhetho olulokuthula njalo olulohlonzi.

"Abafuna ukuyavota, kuzabe kulokuthula njalo kulokuhloniphana."

Uthi ngitsho uMongameli Emmerson Mnangagwa uthi kafuni kube lodlame, kumele abantu bakhethe bekhululekile, esithi abafuna ukuxokozela bazabotshwa kungakhethi ukuthi basekela liphi ibandla.

“Akulakuthi ungowaliphi ibandla, sibopha wonke umuntu oletha ukuxokozela. Sifuna abantu bayevota kungelakwethuselana, kube ukwesabisa."

Njalo ugcizelele ukuthi abakade bezodinga ubuphepheli ababalekela udlakela kumbe ukuhlukuluzwa ngaphansi kweZANU PF, bakhululekile ukuthi baphindele ekhaya esithi kabasoke behlukunyezwe.

“Asisoze sibajezise kumbe sibacale ukuthi babuya lapha. Abanye sebaphenduka ababengekho kulandela izizatho ezinengi. Nxa ubuya eZimbabwe awubuzwa lutho."

Inengi lizalinda ukubona ukuthi amazwi kaMpofu alesiqiniseko esingakanani ngesikhathi kulembiko yokuthi abebandla leZANU PF bathatha inombolo zalabo ababhalisa ukuvota.
Kodwa amapholisa kubikwa ezama ukubona ukuthi ukwethusela akubi khona ngaphambi kokhetho, oluzabanjwa okwakuqala eminyakeni phose engamatshumi amabili kungela muyi, uMorgan Tsvangirai kanye lowayengumongameli uMnu. Robert Mugabe.
Ukhetho luzabanjwa phakathi kwenyanga kaNtulikazi loNcwabakazi.

XS
SM
MD
LG