amalinks wokungena

Breaking News

IZEC Ikhuthaza Abantu Ukuthi Bahlole Amagama Kugwalo Lokuvota


UJustice Priscillah Chigumba lesinye isiphathamandla sekhomishini yeZimbabwe Electoral Commission.

Ikhomishini ebona ngezokhetho eyeZimbabwe Electoral Commission (ZEC) ithi kumele abantu ababhalisela ukuvota kugwalo olutsha lwe voters’ roll behlolisise amagama abo kugwalo olu kusukela ngoMgqibelo kuze kuyefika mhlaka 29 Nkwenkwezi.

Umgcinisihlalo weZEC, uJustice Priscilah Chigumba, uthi kuqakathekile ukuthi abantu bayehlola amagama abo kugwalo lolu ukwenzela ukuthi bengaxotshwa endaweni lapho okuzavotelwa khona ngesikhathi sokhetho lonyaka.

UJustice Chigumba uthi kuyenzakala ukuthi abanye abantu bazathola ukuthi amagama abo kawalotshwanga kahle egwalweni lolu ngakho-ke kumele balungise lokhu ngoba kabasoze bavunyelwe ukuvota nxa amagama abo engahambelani lokulotshwe ezithupheni zabo.

Uthe kulendawo phose ezifika inkulungwane ezilitshumi lanye – 10,807 lapho okuzabe kuhlolwa khona amagama abantu abakugwalo lokuvota olwalungiswa kusukela ngoMpandula ngomnyaka ophelileyo kusiyafika uMabasa lonyaka.

Amagama la alotshwa kusetshenziswa imitshina yeBiometric Voter Registration.

Okwethulwe nguJustice Chigumba kugcizelelwe nguNkosikazi Leticia Kazembe, omunye wama khomishina, othi kugwalo lolu lokuvota, olwaziwa okwamanje ngokuthi yi-provisional voters’ roll, kuzakhitshwa amagama abantu ababhalise amagama abo kanenginengi.

Ukuhlolwa kwamagama la kuzakwenziwa kusukela ekuseni ngo7:00 am kusiya ntambama ngo5:00pm.

Facebook Forum

XS
SM
MD
LG