Ophatheke kwezamalungelo ezombusazwe eGwanda esabelweni seMatabeleland South, uMnu. Shelton Elliot, othi wathunjwa ngabacuphi beCentral Intelligence Organization (CIO) nyakenye bamtshaya kabuhlungu bamquma inwele zakhe eziphothiweyo ngegqamu wanathiswa letshefu, ubotshiwe ngoLwesine esetheswa umlandu wokutshaya omunye wabacuphi othi wayekhona mhla ethunjwa.
UMnu. Shelton Elliot uphatheke kwezombusazwe kusukela lapho kubunjwa ibandla le Movement for Democratic Change njalo usebenze kumacele womabili aweMDC kanye lakubandla lePeople’s Democratic Party ebona ngezomvikela.
Nyakenye ngoNhlolanja uMnu. Elliot uthunjwe ezitolo zePhakama elokitshini leGwanda lapho athi uthethwe ngabecuphi abamtshaye kabuhlungu Bemethesa umlandu wokuchothoza owayengMongameli uRobert Mugabe.
UElliot uthi lokhe elequbu ngokuthunjwa kwakhe ngoba kuze kube lalamuhla kakho oseke wabotshwa kungenani lokuthi loludaba lwabikwa emapholiseni.
NgoLwesithathu emini, UElliot uthi utshayisane lomunye wabecuphi owaziwa ngokuthi Chairman athi waphatheka mhla ethunjwa okudale ukuthukuthela kwakhe.Lokhu kwenzakale endaweni yokunathela phakathi kwedolobho lapho uElliot abikwa ebambe ibhatshi likaChairman wamfuqa okudale ukuthi acele ezinyaweni aye emapholiseni.
UElliot ubanjwe ngamapholisa ayedlula amatshumi amabili ezitolo zePhakama lapho athunjwe khona nyakenye.
UMnu. Nkanyiso Ncube ngomunye walabo ababone uElliot etshaywa ngemva kokuba abotshwa.
UMnu. Gabula ngomunye walabo ababone kusenzakale njalo uthi umangaliswe yikuphatheka kwabacuphi kubotshwa UElliot.
UMnu. Patriotic Ndlovu uthi kuyadanisa ukuthi abecuphi sebethatha umthetho bewufake ezandleni zabo.
UMnu. Wellington Nare, osebenze loElliot kubandla lePDP, uthi ukubotshwa kwakhe kuveza obala ukuthi lokhu ethukuthele njalo kuyadingeka ukuthi labo abahlukuluzwa ngezombangazwe bathole usizo ukuze baxole emoyeni yabo.
IStudio 7 ayenelisanga ukuxhumana lesikhulumeli samapholisa eZansi yemaNdebeleni uInspector Philisani Ndebele ngaloludaba kodwa imbiko ekhona iveza ukuthi uElliot uzamiswa phambi komthethwandaba ngoLwesihlanu esetheswa umlandu wokutshaya lokutshotshozela umvukela emphakathini ngemva kokuba uzulu ehlasele amapholisa abembopha.
