Bonke abantu abalesifiso sokusungula amabhizimusi eZimbabwe bakhuthazwa ukuthi benze lokhu manje amathuba engakaqedwa ngabanye.
Linkuthazo yethulwe ngumsekeli kamphathintambo wezemali lentuthuko kwezomnotho uMnumnzana Terrence Mukupe, emhlanganweni wokukhanga abafuna ukuzosungula amabhizimusi eZimbabwe oqhutshelwe eJohannesburg ngoLwesine.
UMukupe uthe uhulumende kaMnumnzana Emmerson Mnangagwa usebenza gadalala ukususa yonke imigoqo eyenqabela ukusungulwa lula kwamabhizimusi.
UMukupe uthe selokhu kungene uhulumende omutsha isinkulu intshukuntshu yabalesifiso sokusungula amabhizimusi eZimbabwe. Uthe ezinye zalezi inguquko zigoqela ukuqeda ukusilela kwemali kanye lokuba leqiniso lokuthi ukhetho oluzayo lukhululekile.
“Okuseqinisweni yikuthi umthetho obamba ngamandla abakwamanye amazwe ukupha esinye isilinganiso sebhizimusi yabo kuzizalwabe zeZimbabwe usuwesuliwe. Zinengi inguquko ezenzekayo kwezemali. Siphakathi kokuqinisa ibhanga lesizwe. Siphakathi kokuhlela kuhle imithelo yethu. Zinengi inguquko elizazibona eziyibufakazi bokuthi akudlalwa kuyasetshenzwa.”
UMukupe ubuye wakhuthaza izizalwane zeZimbabwe ezisemazweni ukuthi zikhulume kahle ngeZimbabwe lapho ezihamba khona ukuze bakhange abanengi ukwethekelela eZimbabwe lokuyasungula amabhizimusi.
Ezinye zezihloko obekuxoxwa ngazo kulo umhlangano zigoqela amanyathelo athathwa nguhulumende ukuqeda ukusilela kwemali, amanyathelo okufuze umuntu awathathe nxa efuna ukusungula ibhizimusi eZimbabwe, isimo sezombusazwe, lezinye.
Lobanje abanye besithi basafuna ukubona izenzo ngaphezu kwenkulumo ezikhulunywa nguhulumende kamnumnzana Mnangagwa, inengi litshengise ukuthakazelela unxuso lukaMnu. Mukupe besithi sekuthembisa ukuthi izinto zizatshintsha.
Isizalwane seZimbabwe, umqondisi enhlanganisweni ye Zim Achievers, uMnu. Conrad Mwanza, yena ukhumbuze abafuna ukuzosungula amabhizimusi eZimbabwe ukuthi bangafani lembila eyeswela umsila ngenxa yokulayezela.
“Kuqakatheke kakhulu ukuthi lathi njengabantwana beZimbabwe ukuthi bebuye bephendukise izinto abazifundayo ukuthi bathuthukise ilizwe. Ilizwe alisoze lithuthukiswe ngomunye umuntu lizathuthukiswa yithi. Okuqakatheke kakhulu yikubambana, yikuthi sisebenzeni sithuthukise ilizwe, yikuthi labantu abaphetsheya besebenzelane labantu aba local sithuthukise ilizwe.”
UMnu. Nqobile Moyo, omunye wabaqoqe umhlangano wokukhangisa iZimbabwe lowu, uthe nxa bekhuluma labafuna ukuyasungula amabhizimusi eZimbabwe isifiso lethemba kuqhubeka kusanda lobanje kusasekunengi abafuna ukukubona kuguquka ikakhulu indlela obekusenziwa ngayo izinto kuhulumende kaMnu. Robert Mugabe.
“Ithemba lona likhona. Abantu abanengi bazimisele ukuthi baze eZimbabwe ukuthi bazo investor. Igovernment yona ingathi ivule izandla ifuna ukwamukela wonke umuntu and abanengi bakhona they are very keen to invest. Imali balayo. They are optimistic about ifuture yeZimbabwe but bafuna ukuthi kube le policy certainty into ezinengi zicace ukuthi kwenzakalani bengakalethi imali zabo.”
Kodwake abanye basalensolo. UMnu. Marko Machona, umqondisi webandla leAfrican Democrats, uthe uhlupho yikuthi uhulumende ukhuthele ekunxuseni abakwamanye amazwe ukuthi bazosungula amabhizimusi, kodwa elizweni kulokhu kusasenzima kakhulu ukuthi izizalwane zeZimbabwe ezingelamali etheni zisungule amabhizimusi asemthethweni.
Loba kunjalo isiphathamansla senkampani ye Titan Law in Zimbabwe, uMnu. Gerald Mlotshwa, uthi selokhu kungene uhulumende omutsha isiqala ukubonakala inguquko yokwenza izinto eZimbabwe.